66% dels islandeses que participèron, dissabte passat, al referendum sus l’esbòs de nòva constitucion, an balhat lor sosten a aquela proposicion de tèxt, redigida per una comission de 25 ciutadans elegits en novembre de 2010, e qu’a admés de contribucions via Facebook e Twitter. Participèron al referendum la mitat de l’electorat, que votèron majoritàriament per la reforma prepausada de la constitucion. Pr’amor que lo referendum èra pas vinculant, lo parlament deu decidir s’adòpta las proposicions o se las modifica.
 
Dissabte passat, los ciutadans islandeses foguèron apelats a las urnas per dire s’èran d’acòrdi amb las proposicions del conselh constitucional per que sián la basa de l’esbòs novèl de la constitucion. Dins la consultacion, i aviá tanben cinc questions particularas, que foguèron tanben aprovadas, coma per exemple s’òm voliá que las ressorsas naturalas que son pas de proprietat privada se nacionalizèsson.
 
 
Revolucion democratica
 
Dempuèi lo potz ont tombèt Islàndia en 2008, amb l’enfonzament de tres bancas e la casuda liura de la moneda e del PIB, aquela illa de l’Atlantic Nòrd s’es recuperada economicament mercés a una ondada de regeneracion democratica sens precedents, e sovent es vista coma modèl dins tot lo Mond. Los islandeses cambièron lo govèrn e forcèron a una reforma constitucionala en seguissent un procès original, qu’arribèt dissabte a una fasa cruciala, amb lo referendum sus l’esbòs de constitucion elaborat per una comission de 25 ciutadans.
 
D’efièch, lo 16 de junh de 2010, lo parlament islandés aprovèt la creacion d’una assemblada constitucionala (Stjórnlagaþing) amb la tòca de revisar la constitucion de la republica. Lo 27 de novembre d’aquel meteis an, s’elegiguèt los 25 delegats entre de ciutadans de tot lo país. E mai se la Cort Suprèma invalidèt lo vòte per qualques irregularitats formalas, lo parlament decidiguèt d’integrar los 25 delegats en un conselh constitucional per poder contunhar lor esbòs, que se presentèt al parlament lo 29 de julhet de 2011.