Lo govèrn dels Estats Units a anonciat que dobrirà mai del 90% de sas aigas continentalas dels oceans Atlantic, Pacific e Arctic a l'exploracion del petròli e del gas, çò rapòrta The Washington Post. Aquela decision "ignòra las mesuras basicas de seguretat dins l’exploracion de la mar" e "fa córrer un risc enòrme a las comunautats de pescadors e d’autras que vivon de la mar, a la fauna marina, a la santat publica e al clima", çò planh Greenpeace. De fach, l'article que publicam uèi Sapiéncia e Jornalet ensems, avertís del contunh espandiment de las zònas mòrtas dins los oceans de la Tèrra.
 
La decision de l'administracion Trump es un "present" a l'indústria dels carburants fossils, que desenant poirà far d'operacions dins d'endreches afectats per de desastres environamentals coma lo que lo patiguèt Florida après l'explosion de la plataforma Deepwater Horizon dins lo Golf de Mexic en 2010, que causèt la mòrt d'onze personas e l’escampament de milions de litres de petròli dins la mar.
 
 
Abandon de l'Acòrdi de París
 
En junh passat, Donald Trump anoncièt que son país se retirariá de l’acòrdi de París de 2015 que voliá arrestar lo cambiament climatic. Aquela decision daissa los Estats Units al marge del consens mondial, e mai los Estats Units sián, après China, lo país qu’emet mai de gases amb efièch de sèrra (lo 18% del total mondial), mentre que las emissions de Nicaragua e de Siria ensems ne representan solament lo 0,24%.
 
L’argument de Trump per justificar sa decision es que vòl reactivar qualques sectors industrials dels Estats Units, mai que mai lo sector minièr. Mas qualques analistas creson que lo nòu president a l’obsession d’escafar tot lo legat de Barack Obama. Per aquela rason, sembla que Trump pensa pas de complir cap dels engatjaments del president anterior, e doncas, la partença de l’Acòrdi de París se farà còp sec sens respectar la procedura pachada, que se deuriá far dins un relambi de tres o quatre annadas.