La vila aranesa de Les (Quate Lòcs) visquèt ièr divendres un esglasi màger. A l’entorn de 9h del matin prenguèt fuòc un camion-cistèrna cargat de gas qu’èra pargat a l’intrada de la vila, çò rapòrta Aué TV. Lo fuòc l’auriá provocat una fugida de gas del veïcul, que sa tòca èra de descargar lo gas natural dins un depaus del centre piscicòl de Les.
 
Sul pic, las autoritats localas, aranesas e catalanas se coordenèron per gerir la crisi. La comuna faguèt sonar l’alarma e demandèt als abitants de Les lor confinament pr’amor del risc quimic entrò aperaquí 11h. Los escolans de l’escòla Alejandro Casaona foguèron evacuats.
 
Mentretant, los pompièrs d’Aran trabalhèron a l’extincion del fuòc. S’amassèron los de las casèrnas de Les, Bossòst e Vielha en accion conjoncha amb la polícia catalana, los Mòssis d’Esquadra. Pendent gaireben tota la jornada l’estrada N230 foguèt talhada, e lo sol ligam d’Aran amb l’estat francés se fasiá a travèrs del pòrt de Portilhon, que reünís Aran e Luishon. Las vilas de Les, Bausen e Canejat demorèron sens comunicacion amb la rèsta de la Val.
 
Los escolans, collegians e liceans de l’Escòla Garona e de l’INS Aran, que demòran a Les e Canejan, deguèron restar tota la jornada dins lor centre escolar a Vielha. Per lor ajudar, lo Conselh General d’Aran lor ofriguèt un repais e un autobús que los menèt devèrs lors vilas après la redobertura de l’estrada. Mentretant, los escolans foguèron tostemps acompanhats per la conselhièra Anna Diaz, qu’avertiguèt totas las familhas dels escolans afectats.