La Federacion Interregionala dels Mèdias Occitans (FIMÒC), que Jornalet ne fa partida, prepausa dos servicis civics en Bearn. Lors missions començarián a partir del 24 de genièr per una durada de 8 meses, 24 oras per setmana, amb la tòca de desvolopar d'accions que favorizen l'accès de totes a l'ofèrta de las produccions audiovisualas, radiofonicas e editorialas en occitan.
 
Un servici civic es un engatjament volontari de l'interès general dobèrt als 16-25 ans (alargat als 30 als joves andicapats), e es indemnizat per l'estat.
 
En aquesta escasença, la FIMÒC a decidit de menar sa pròpria enquèsta sociolingüistica, adreiçada a tot public concernit per la problematica de la salvagarda e la promocion e la difusion de l'occitan, en tot ensajar de definir la plaça e las representacions dels mèdias occitanofòns dins la societat. Se tractarà tanben d'avalorar precisament las tendéncias d'usatge e e de consume de la produccion actuala.
 
Los volontaris deuràn descobrir e prospectar las estructuras e las associacions retransmeteiras, anar al davant dels publics amirats a l’ocasion d'eveniments culturals occitans dins lo departament dels Pirenèus Atlantics, realizar de sondatges o encara anar rescontrar los mèdias membres per amassar d'informacions sus lors produccions.
 
Per mai d'informacions podètz consultar l'anóncia oficiala del servici civic e lo sit de la FIMÒC.