Lo títol d’aqueste florilègi qu’ei lhèu estat causit en referéncia au poèma de Marcèla Delpastre “Color de tèrra, de ruscha e de raiç” qui figura dens l’antologia aquesta.
 
Ua antologia qui fòrma part d’un collecion beròi interessanta: Florilègi occitan.
 
Que nse brembam de l’obratge multilingüe “Cant de las vilas” publicat en 2007 suu quite principi e dens la quita colleccion.
 
Color femna qu’ei ua produccion intellectuau qui s’inscriu dens la manifestacion exagonau “Le printemps des poètes”.
 
Lo prefaci qu’ei signat per excellents coneishedors en literatura: Joan-Claudi Forèst, Clara Torreilles e Maria Joan Verny.
 
En chic de frasas qu’ ac ei tot dit e sintetizat.
 
De soslinhar qu’arrepresenta l’antologia autanplan hemnas qu’escriven a la vaduda de la literatura occitana: ua escritura que s’esten lavetz deu sègle dotze, la de las trobairitz, a la finessa deu sègle XVIIIau, au romantisme e las pastorèlas deu sègle d’après, a las autora deu felibritge, a las escrituras apuish mei singularas de Loïsa Paulin, de Clardelua dinc au diamant d’esperit escriut qui ei lo poèta Marcèla Delpastre.
 
Quaranta-tres poèmas occitans escriuts per hemnas de las trobairitz a inedits de uei lo dia.
 
Tèxtes en edicion bilingua dens un liberet deu format carrat de 56p. acompanhant lo CD audio.
 
Tanben un tau florilègi que permet de non pas passar a costat d’escrituras actuaus autant singularas e prometoras: Estela Comellas, Domenja Descomps, Anne Regourd, Terèsa Pambrun o d’encontrar las fulguranças d’ua Danièla Estebe-Hoursiangou dab l’Aute pòble “Nosautes, vaste pòble...de las nostas eternitats de hrairs d’èrba e estela...”.
 
Las de mensh de trenta ans Aurelià Lassaque o Melia Bourdoncle... e d’autas, que dan a pensar que las singularitats de l’escritura feminina que son  portada per autant d’autoras de uei.
 
Hemnas qui an de composar e pausar ua òbra que non mancaram pas de léger!
 
Entau disc: quauque votz masculina, la de Felip Martel… e suspresa la de Joan Pau Verdier entau tèxte de Marcèla Delpastre l’Amor, dit d’ua votz unica e hicat en musica - ua guitarra de la bocla lancinanta - per Frank Lutton.
 
De citar a títol de curiositat d’autas cantairas com Claudia Galibèrt o Maria Rouanet. E solide un haish de votz: de Teresa Pambrun a Maria Joana Verny (qui’s talha la part de la liona en çò qu’ei de las lecturas), d’Adelina Yzac a Toni Escala, d’Anne Regourd a Miquèla Stenta o Josiana Ubaud.
 
Los tèxtes que son bracs d’un punhat de segondas a cinc minutas e mieja au mei.
 
De dòu har que los enregistraments en siin tant inegaus (n’i son qui ratrapan d’autes): n’ajuda pas a l’escota e a la descoberta.
 
En mei deu cd, sus Internet en linha que trobaràn un aparelh pedagogic dedicat a Color femna, sustot axat sus l’escritura de trobairitz, signat Miquèla Stenta.
 
 
 
 
Domenja Lekuona
Ràdio País
 
 
 
 
 
_____
1 CD-libe de 56p. Illustracions Clipart ETC University of South Florida + 1 cd audio deus 43 tèxtes per la màger part simplament lejuts a votz nuda.
 
L’editor qu’ei Montpelhienrenc: CRDP DE L’ACADEMIE DE MONTPELLIER en  tota fin de 201 (1r de deceme).
 
Aqueste obratge que pòt servir l’aprentissatge de las lengas vivas, ací l’occitan dens las soas modalitats lengadociana, provençau, lemosina o gascona.
 
Que s’adreça autanplan aus deu collègi, a l’ensenhament segondari e qui son dens la via generau (com sòla d’agulhar de d’òra los gojats de uei-lo-dia). E que’s tròba au prètz de 15 euros. Ligam dinc a la fica suu site deu Scerén.
 
Supòrts imprimit e enregistrat. Ref: 340PB862, còdi a barra 9782866264444, ISBN/ISSN 978-2-86626-444-4/