L’albanés es lenga oficiala dins tot l’estat de Macedònia, çò rapòrta Nationalia. Lo parlament macedonian aprovèt l’11 de genièr passat, amb 69 vòtes sus 120, una lei que fa de l’albanès la segonda lenga oficiala dins tot lo territòri estatal, al costat del macedonian. Fins ara, l’albanés èra solament oficial dins las comunas ont los albanofòns èran mai del 20% de la populacion.
 
La lei s’es pogut aprovar gràcias a l’acòrdi de govèrn entre lo Partit Socialdemocrata, del primièr ministre Zoran Zaev e de majoritat macedoniana, e los partits de majoritat albanesa. Lo partit nacionalista macedonian conservator VMRO, dins l’oposicion, boicotèt lo vòte, en argumentant que l’oficialitat de l’albanès èra anticonstitucionala e que contribuiriá a aumentar las tensions entre albaneses e macedonians.
 
Segon lo recensament de 2002 —lo darrièr que s’es fach— lo 64% dels abitants del país s’identifican nacionalament coma macedonians, lo 25% coma albaneses, lo 4% coma turcs e lo 3% coma ròms.
 
Macedònia ven lo tresen estat ont l’albanés es lenga oficiala dins tot lo territòri, après Albania e Kosova.
 
La nòva lei permet que los locutors de l’albanés pòscan emplegar lor lenga dins l’administracion publica de Macedònia tota e que la lenga siá presenta dins totes los documents oficials de las institucions de la republica.
 
S’agís d’una lei fòrça semblabla a la de l’occitan en Catalonha. Pasmens, los deputats occitans pòdon pas parlar occitan als parlaments francés, espanhòl e italian, mentre que o fan normalament al Parlament de Catalonha. Ara, tanben los deputats albanofòns se poiràn exprimir en lor lenga a l’Assemblada de Macedònia.
 
D’autres estats europèus preveson la cooficialitat a l’escala estatala de mai d’una lenga dins lors constitucions. Es lo cas de Luxemborg, Finlàndia, Irlanda, Bielorussia, Malta, Chipre e Kosova.