L’estatut DACA (sigla anglesa de l’Accion Diferida per las Arribadas d’Enfança) “es practicament mòrt”, segon Donald Trump. Lo president estatsunidenc carga tornarmai los democratas sus un possible acòrdi migratòri mentre que menaça que lo govèrn lo barre aqueste divendres venent. “En realitat los democratas lo vòlon pas, eles vòlon pas que parlar d’argent quand en vertat nos es desesperadament necite pels nòstres militars”, çò precisèt dimenge lo cap de l’executiu dels Estats Units.
 
En seguida, coma Trump tornèt comunicar sus Twitter, son mèdia preferit, “coma president vòli que vengan dins nòstre país de mond que nos ajuden a èsser pus fòrts e grands un còp de mai, de mond qu’arriben per mejan d’un sistèma de MERITIS. Pas pus de lotariás! America d’en primièr”. De precisar que quand parla d’America fa referéncia solament als Estats Units.
 
Aquelas fiuladas de Trump sortisson qualques oras après que son govèrn a tornat recebre de sollicitacions de renovelament pels diches “dreamers”, çò es “somiaires”, jos l’estatut sonat DACA gràcias al qual certans immigrants menors intrats illegalament dins lo territòri pòdon beneficiar d’una moratòria de dos ans sus lor expulsion e de l’elibilitat d’un permés de trabalh.
 

DACA is probably dead because the Democrats don’t really want it, they just want to talk and take desperately needed money away from our Military.

— Donald J. Trump (@realDonaldTrump) 14 de gener de 2018

 

I, as President, want people coming into our Country who are going to help us become strong and great again, people coming in through a system based on MERIT. No more Lotteries! #AMERICA FIRST

— Donald J. Trump (@realDonaldTrump) 14 de gener de 2018

 
 
De païses merdoses
 
Aquelas declaracions seguisson d’autras fòrça escandalosas. Lo president descadenèt la polemica en qualificant Haití, Lo Salvador e certans estats africans de “païses merdoses” (en anglés “shithole countries”, es a dire, “païses de trauc de mèrda”).
 
Pendent un debat sus d’eventualas reformas migratòrias que facilitarián l’intrada d’emigrants de certans païses levats del programa de proteccion temporària coma Lo Salvador, Haití, Nicaragua o Sodan, Trump demandèt: “Perqué venon aicí totas aquelas gents de païses merdoses?”
 
Trump apondèt que preferissiá que los immigrants qu’arriban als Estats Units provenguèsson de païses coma Norvègia. La velha, aviá rescontrada la primièra ministra d’aquel país.
 
Los comentaris de Trump espaventèron los parlamentaris presents a l’eveniment, segon The Washington Post. En mai d’aquò, Los Angeles Times confirmèt l’episòdi, e ajustèt d’autres comentaris de Trump prononciats durant aquela reünion, coma quand exclamèt: “Perqué volèm d’haitians aicí? Perqué volèm tot aquel mond d’Africa aicí?”.
 
Totun, l’Ostal Blanc deneguèt  puèi que Trump aguèsse faches aqueles comentaris.