Lo Conselh General d’Aran presentèt divendres passat lo rapòrt juridic sul drech de decidir de la Val d’Aran. Lo rapòrt sus aquel drech, reconegut dins la Lei d’Aran de 2015, l’an redigit los juristas de l’Universitat de Barcelona Alfredo Galán e Eduard Roig a la demanda del govèrn de la Val. Pendent la presentacion aquestes soslinhèron qu’èra lo primièr còp qu’un tèxt normatiu reconeissiá especificament aquel drech d’autodeterminacion d’un territòri. Totun, Galán precisèt qu’aquel drech se limitava al territòri de la Comunautat Autonòma de Catalonha car es lo Parlament de Catalonha que l’a reconegut.
 
Dins aquel sens e dins l’encastre juridic actual, en cas d’independéncia de Catalonha, la Val d’Aran deuriá començar un procès nòu per definir quina sòrta de relacion politica e juridica vòl téner dins aquela nòva republica.
 
De son latz, lo sindic d’Aran, Carlos Barrera, expliquèt que lo Conselh General d’Aran aviá encargats d’aquel rapòrt los juristas per esclarzir çò que significava en tèrmes juridics lo drech de decidir del pòble aranés, en tot precisar qu’es solament en vigor dins l’encastre territorial e administratiu del Parlament de Catalonha. Dins aquel sens, expliquèt que lo govèrn aranés aviá encargats los juristas d’un autre rapòrt per veire se las institucions e l’autogovèrn d’Aran poirián èsser reconeguts dins tot l’encastre de l’estat espanhòl, en cas d’una eventuala revision o reforma de la Constitucion espanhòla.