De brigadistas internacionals de pertot son anats ajudar als milicians curds a Efrîn en Rojava (Curdistan de Siria), contra las atacas de l’armada turca, e contra l’autoproclamat Estat Islamic. Demest eles se tròba una brigada de bretons, en provenença dels movements bretonista e antifaissista, coma se pòt observar sus aqueste vidèo publicat aquesta setmana per ANF News, que quitament mençona Bretanha coma país que combat l’Estat Islamic.
 
Lo sosten internacional a las milícias curdas de las YPG arriba après que lo govèrn turc e lo president Recep Tayyip Erdoğan anoncièron una intervencion militara de granda escala per ocupar la region d’Efrîn, jol pretèxt d’agir contra lo terrorisme. I a de voses dins lo movement curd que crenhon qu’Efrîn venga un nòu Kobanê, la vila martira curda. La tòca de long tèrme de Turquia es d’avalir o, almens, d’afeblir l’autogovèrn curd dins lo nòrd de Siria e, a l’encòp, de refortir de posicions dins aquel país per i aver mai de capacitat d’influéncia.