Ua bèra iniciativa de la comuna de Nogaròu, en Baish Armanhac, qui segueish lo camin entamenat despuish quauquas annadas de cap tau plan minjar. En efèit, aqueth mes de genèr que’s tròba a la bibliotèca de la vila un libe navèth aperat Tastat e aprovat a la cantina de Nogaròu. Particularitat de l’òbra:  Qu’ei a gratis e a disposicion deu public sus demanda. Lo prètzhèit qu’ei de ligar l’alimentacion de la cantina dab la de casa. Que cau precisar que la cantina de l’escòla pòrta un projècte alimentari particular: la creacion d’ua cosina autentica, virada cap au gost e au shuc, a la qualitat deus produits bio, au fresc e au hèit a casa. Gavidada per ua esquipa engatjada, que vòu dar aus mainatges l’alimentacion la mei sana qui’s posca. A l’escòla donc, mes tanben au delà. Qu’ei çò qui’us balhè l’idèa d’anar mei luenh enqüèra, e donc d’escríver aqueth libe, qui en mei de las recèptas (totas tastadas a la cantina) balha conselhs de nutricion tà estar en bona santat.
 
 
Dejà un prèmi l’an passat
 
Aquera iniciativa n’ei pas totun ua suspresa sancèra. En efèit, en noveme passat, dejà, lo cap de cantina, Hugo Dereymez, que s’avè emportat lo prèmi “Cosinèr” a la ceremònia de “Las victòrias de las cantinas rebèllas” organizada per l’associacion Un Plus Bio. Un prèmi qui recompensava ua chifra unica: en 2017, un 43% de las crompas qu’èran hèitas en bio (quan la mejana nacionau èra d’un 3,2% en 2016). Un Plus Bio qu’ei ua associacion creada en 2002 entà espandir lo bio au dehens de las restauracions collectivas.
 
Costat finança, enfin, se lo prètz de còst d’un repaish qu’ei de 7,10 èuros, qu’ei totun perpausat a 2 èuros taus escolans de la vila e 4,70 èuros tà las comunas vesias.
 
Taus resignats qui veden com inevitable lo camin cap au mauminjar esparnhós e donc industriau, aquera iniciativa (en mei de las autas qui’s multiplican drin pertot), qu’amuisha que la bona cosina n’ei pas incompatibla dab la restauracion collectiva o los budgets sarrats. Qu’ei prumèr un engatjament politic locau
 
 
 
 
Joan-Nadau Commères
 
 

---

CHAMPOMIER, Véronique e DEREYMEZ, Hugo. Goûté et approuvé à la cantine de Nogaro.  Nogaròu 2018. Distribucion gratuita.