Vaquí vengut lo mes de febrièr e lo retorn de la Superliga e del Championship en Euròpa tre aquesta primièra dimenjada, puèi la debuta del campionat NRL als Antipòdes.
Elèit 1: primièra victòria, primièra desfaita
La seisena jornada del campionat d’Elèit 1 foguèt marcada dissabte per la primièra desfaita de la sason de l’SO Avinhon sus la pelena de Sant Estève: 26-16. Amb plan de dificultats, Limós s’anava impausar a Albi: 24-16.
Dimenge, veniá a Sent Gaudenç de signar sa primièra victòria de la sason en ganhant lo dèrbi a Tolosa: 40-36. Palau signava sa segonda victòria de reng en batent Vilanòva d’Òlt: 32-18.
Al Molin de Lesinhan, l’afrontament amb lo vesin de Carcassona tenguèt pas sas promessas. Entre una formacion en fisança e dinamica e un grop ont mancava qualques jogaires quadres e que pachaquèt fòrça palmas e situacions, la diferéncia montèt fins a 31-6 en favor dels Verd e Blanc.
Al programa de la dimenjada qu’arriba: Carcassona-Albi, Lesinhan-Dragonets, Limós-Palau, Vilanòva-Tolosa e Sent Gaudenç reçauprà lo cap de fila Avinhon.
La Copa bravoneta per l’Elèit 1
Dissabte, al sèti de la Federacion a Carcassona, se tirèron las partidas dels 1/ns de finala de la Copa que se debanaràn los 17 e 18 de febrièr. Un sol rescontre opausarà doas formacions d’Elèit 1: Carcassona reçauprà Tolosa a Domèc.
Las autras 7 formacions d’Elèit 1 jogaràn cò de lor adversari: St Esteve-XIII Catalan cò del vesin Illa de Tet, Lesinhan a Salsas, Avinhon a Ferrals, Palau a Selon, Albi a Trentels, Limós a Caumont e Sent Gaudenç en Cabardés contra Vilagalhenc-Argon.
Los Dragons a Widnes
Es a Widnes aqueste dimenge 4 de febrièr de vèspre, cò dels Vikings, que los Dragons Catalans jogaràn la primièra partida de la sason 2018 de Superliga.
La sason se dobrirà tre dijòus amb Warrington-Leeds e Hull FC-Huddersfield. Divendres, per son retorn al primièr nivèl, Hull KR reçauprà Wakefield. Son tanben al programa de divendres: Salford-Wigan e St Helens-Castleford.
En Championship, Tolosa dobrirà la sason amb la recepcion dels Leons de Swinton, aqueste dissabte 3 de febrièr a 3 oras del vèspre sus la pelena de l’estadi de Blanhac.
Alan Roch
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari