La Chambra d’Òc ven d’aviar lo  projècte de produire un filme sus un dels episòdis màgers de l’istòria occitana, l’extermini del catarisme e de tot lo mond que s’èra desvolopat a l’entorn. Entitolat Bogre, lo filme parlarà del catarisme e de sas originas sortidas del bogomilisme bulgar. Lo títol es pro clar: “bogre” en occitan significava originàriament abitant de Bulgaria, e long del temps a pres un significat d’inapte, de coquin, de persona malfisenta qu’amaga la vertat. “A l’entorn dal sègle XII aquel tèrme devenèt un insult adreçat ai catars d’Occitània, colpables d’una religion ren ortodòxa semblabla per doctrina a un autre grand movement erètic europèu, aquel di bogomils bulgars”, çò explican los promotors del filme.
 
Lo filme, rodat dins los Balcans e en Occitània, farà intrar l’espectador “dins la quotidianitat de l’èsser catar e bogomil en aquilhi ans. Catars èron pas mas que lhi sèrvs e lhi païsans que s’opausavon  a l’aut clerjat e ai feudataris —coma s’es passat per lo bogomilisme— mas decò las classas marchandieras e sabentas de la vila. Son tantas las familhas d’aut linhatge qu’an embraçat la novetat de la doctrina catara. A Firenze èron catars de personatges que tuchi conoissèm, coma Farinata degli Uberti , lo poèta Guido Cavalcanti e, segon d’estudis recents, lo mesme Dante Alighieri.”
 
Lo projècte es menat a tèrme per de professionals del cinèma coma Fredo Valla , Andrea Fantino e Elia Lombardo; per d’especialistas del catarisme e del bogomilisme coma Maria Soresina, e d’organizaires culturals de l’airal occitan coma Inés Cavalcanti e tota la còla de la Chambra d’Òc. E mai, an jonch la còla lo Centre Ivan Dujčev de Sofia, lo CIRDÒC e l’Istituto Internazionale Lorenzo de’ Medici de Floréncia.
 
Per finançar aquel projècte, an mes en linha un micromecenatge, çò que nos dona a totes los occitans, e als amics d’Occitània, l’escasença de poder collaborar amb un dels projèctes pus grands per la dignitat del país nòstre. An amassat gaireben 11 000 èuros mas ne rèsta encara per arribar a la tòca dels 18 000 èuros. Avèm mens de 13 jorns per ajudar. Anem! Clicatz aicí.