Que comence ena Val d’Aran era 39u edicion dera Marcha Beret, era prestigiosa corsa d’esquí de hons d’estil classic que combine ara perfeccion eth naut nivèu esportiu damb es amators. Coma cada an, era marcha qu’amassarà uns 1000 participants. Eth nombre d’inscriti agèr ère ja de 700.
 
Ath delà des familhes e des grops d’amics que participen de manèra populara, era Marcha Beret tanben atrè quauqui centenats de participants d’elèit, vengudi enguan de païsi coma Norvègia, Suècia, Finlàndia, Soïssa, França e Itàlia.
 
Maugrat qu’era corsa principau comence deman a 10h en Beret, aué tà meddia se debane eth Sprint Salomon, ua pròva d’exibicion de 36 esportius d’elèit.
 
Era corsa que prepause 3 distàncies —10 quilomètres, 21 quilomètres e 42 quilomètres— que passen peth Plan de Beret a 1850 mètres de nautada. Enguan s’a trabalhat en melhorament e increment dera senhalizacion deth circuit enes tres categories de competicion, e an anonciat qu’es distàncies 21 e 42 quilomètres passaràn per Montgarri.
 
Era corsa qu’ei promoiguda peth Conselh Generau d’Aran e pera estacion d’esquí de Vaquèira-Beret. Que compde, ath delà, damb era collaboracion der Ajuntament deth Naut Aran, dera Associacion des Volentaris dera Val d’Aran e d’auti organismes e entitats mès dera Reiau Federacion Espanhòla des Espòrts d’Iuèrn e dera Federacion Catalana des Espòrts d’Iuèrn.
 
 
 
 
 FM