Espanha poiriá pèrdre los dreches qu’a coma estat membre de l’UE, comprés lo drech de vòte al conselh, se contunhan las menaças de militars contra Catalonha e se lo govèrn espanhòl las fa pas arrestar, segon l’article 7 del Tractat de Lisbona. Aital o an remembrat los eurodeputats catalans Ramon Tremosa (CiU), Raül Romeva (ICV), Maria Badia (PSC) e Ana Miranda (en representacion d’ÈRC), qu’an mandat una letra personalizada a Viviane Reding, vicepresidenta de la Comission Europèa.

Li demandan que se pronóncie publicament contra la possibilitat que, pendent lo procès catalan, cap de grop de l’armada decidisca d’emplegar la fòrça contra la populacion catalana.
 
Dins aquela letra, los eurodeputats dison:
 
“L’Union Europèa ven de recebre lo Prèmi Nobel de la Patz de 2012 e especifica dins lo sieu article 2 e 3 del Tractat de l’Union que la patz es una de las siás tòcas. Es doncas fondamental que la Comission Europèa, coma institucion que velha pels Tractats de l’Union, se pronóncie en exigissent publicament que se retire del debat public tota menaça militara o d’usatge de la fòrça armada coma via de resolucion d’aquel conflicte politic, en prenent en compte, mai que mai, que cap de representant del govèrn espanhòl a disqualificat publicament aquelas declaracions bellicosas, e qu’en mai d’aquò, qualques unas de las associacions que se son prononciadas representan de militars actius”.
 
Los eurodeputats remembran tanplan que “l’article 7 del TUE [Tractat de l’Union Europèa] establís un procediment de contraròtle e de recomandacions, que pòt derivar en la suspension del drech de vòte d’un estat al Conselh, e que deu èsser utilizat se i a un «risc clar de violacion grèva e persistenta de las valors comunas». Vos demandam doncas qu’avaloretz los risques reals d’una possibla intervencion militara en Catalonha e lo ton qu’emplegan de membres del Partit Popular espanhòl e del govèrn d’Espanha. La Comission Europèa deu èsser capabla de determinar quand començar lo procediment de l’article 7 contra l’estat espanhòl s’aquel respond pas democraticament davant las demandas ciutadanas”.


Vergonha, Sénher Vidal Quadras
 
Dins aquel sens, l’eurodeputat neerlandés Derk J. Eppink, del partit flamenc Lijst-Dedecker, demandèt dimars al Parlament Europèu la demission del vicepresident, Alejo Vidal Quadras.
 
Eppink remembrèt que lo vicepresident de la cambra aviá demandat l’intervencion de la Guardia Civil en Catalonha per n’evitar l’independéncia e mandèt una letra als eurodeputats que “sembla redigida per Franco”.
 
Eppink remembrèt que l’Union Europèa a obtengut lo prèmi Nobel de la patz, e que l’actitud del Partit Popular en Espanha es totalament opausada al biais de far en democracia. Mai que mai en o comparant amb l’actitud de Cameron amb Escòcia. “Daissatz los catalans votar en patz” apondèt Eppink, qu’acabèt lo discors en disent en espanhòl: “vergonha, Sénher Vidal Quadras!”