L’Acadèmia de Limòtges —una de las onze subdivisions escolaras que tòcan Occitània dins l’estat francés— a signat una convencion pel desvolopament e l’estructuracion de l’ensenhament de l’occitan. La convencion l’escriguèt arunan l’Ofici Public de la Lenga Occitana (ÒPLO) e la signèt la ministra de l’educacion d’alavetz. Ara l’an mesa en plaça en Lemosin e la signèron divendres passat la presidenta de ÒPLO, Charline Claveau-Abbadie, lo president del conselh regional de Nòva Aquitània, Alain Rousset, e lo rector de l’Acadèmia de Limòtges, Daniel Auverlot.
 
Lo tèxt seguís çò que s’establiguèt l’an passat per las acadèmias que tòcan los territòris occitanofòns de las regions administrativas qu’an pres lo nom d’Occitània e de Nòva Aquitània: assegura d’oraris normals a l’ensenhament de l’occitan, planifica una produccion e la distribucion de material pedagogic en lenga nòstra, pòrta de melhoraments als pòstes dels ensenhaires occitanofòns e a lors cerfificacions, e prevei la difusion dels ensenhaments de l’occitan o en occitan dins las escòlas publicas.
 
Amb aquela ratificacion, los signataris s’estacan a valorizar la lenga e la cultura occitanas tot de long de l’escolaritat, facilitar l’ensenhament bilingüe francés-occitan e sa continuitat, assegurar lo pilotatge e l’animacion pedagogicas necessàrias, assegurar la produccion e la difusion de ressorsas pedagogicas adaptadas, favorir lo desvolopament de formacions a l’occitan dins los establiments d’ensenhament superior, desvolopar un contèxt lingüistic e cultural occitan viu e complementari de l’ensenhament e assegurar l’informacion a las familhas.
 
Aquò es sens cap de dobte una reüssida de las bèlas que se deu aplicar a la mitat occidentala d’Occitània, es a dire Gasconha, Guiana, Lemosin e Lengadòc, franc dels parçans de Velai, de Vivarés e d’una partida de Gavaudan (l’airal de Sau). Demorarà fòra la convencion aquel tròç de Lengadòc e tanben Auvèrnhe, Daufinat e Provença, puèi que las regions dichas Provença-Alps-Còsta d’Azur e Auvèrnhe-Ròse-Alps an pas volgut integrar l’ÒPLO, per ara, ni la region Centre-Val de Léger, ont tanben i a de parlants d’occitan. 

 
 

 

Très heureuse d'avoir signé aujourd'hui une convention pour le développement de l'enseignement de l'occitan entre le rectorat de Limoges, la région Nouvelle-Aquitaine et l'OPLO @al_rousset@aclimogespic.twitter.com/ivqX96crhO

— Charline Claveau (@CharlineClaveau) 2 de febrer de 2018