Stéphanie Colonna, molhèr d’Yvan Colonna, abordèt dimats passat lo president francés, Emmanuel Macron, a la sortida del musèu Fesch, a Aiacciu. “Mos enfants  pòdon pas veire lor paire dempuèi un an e mièg. Es pas un animal, es un èsser uman”, çò diguèt Colonna al president Macron, qu’es a vesitar oficialament l’illa. “Se vos plai, president, fagatz quicòm”, çò insistiguèt.
 
Stéphanie Colonna donèt la man a Macron e parlèt amb el durant quatre minutas. Ela precisèt que demandava pas l’amnestia de son marit, mas un tractament just e uman. Macron s’engatgèt a o far. “O espèri, me fisi de vos”, çò respondèt l’esposa del presonièr còrs.
 
Yvan Colonna es condemnat definitivament a perpetuitat per l’assassinat del prefècte Claude Erignac, e mai aja totjorn clamat son innocéncia. Èra embarrat a la preson de Tolon mas dempuèi la fin de 2012 se tròba dins la d’Arle. Justament, un omenatge a Erignac foguèt lo primièr acte que lo faguèt Macron pendent son viatge oficial a Corsega.
 




Macron vesita l’illa dos meses après la granda victòria electorala dels sobeiranistas còrses. E mai  lo president de l’Assemblada de Corsega, Jean-Guy Talamoni, li reclame un “dialòg sens tabó”, lo govèrn francés refusa las revendicacions dels elegits còrses: la reconeissença de la lenga còrsa coma egala del francés, l’amnestia pels presonièrs politics, un estatut especial de residéncia per que Corsega pòsca frenar la crompa d’ostals pels estrangièrs que i venon sonque passar l’estiu. Pasmens, dins son discors de Bastia de dimècres, lo president Macron assolidèt la necessitat del desvolopament del bilingüisme en Corsega e prometèt l'inscripcion de Corsega dins la Constitucion francesa.