Dos grands investidors del gigant informatician Apple an demandat a la societat que fabrica l’iPhone de prene de mesuras per combatre la creissenta addicion al telefòn mobil demest los enfants, çò rapòrta The Guardian. Los investidors se mòstran chepicats pels efièches marrits suls enfants dels aparelhs electronics e tanben dels rets socials. Los investidors en question son Jana Partners LLC, de Nòva York, e lo Sistèma de Retirada dels Ensenhaires de l’Estat de Califòrnia. Ensems an dos miliards de dolars d’accions d’Apple.
 
Dins una letra mandada a Apple, las doas societats investidoiras dison que lo gigant tecnologic pòt aver un ròtle fondamental per que l’indústria tecnologica s’interèsse abans tot a la santat e al desvolopament de las generacions avenidoiras. Per elas, l’impacte de l’usatge dels telefonets intelligents e dels rets socials es inquietant, sustot quand se comença de los emplegar tre l’enfança.
 
Dins aquel sens, demandan que s’establisca un comitat d’expèrts amb d’especialistas del desvolopament infantil, qu’ofriscan d’informacions abondosas als cercaires per que melhoren lo logicial dels dispositius e que los parents pòscan atal protegir la santat de lors enfants.
 
“I a un clar besonh qu’Apple ofrisca als parents mai d’espleches per s’assegurar que los joves consumaires utilizen vòstres produches de biais adeqüat. O afrontar melhorarà ara la valor de long tèrme per totes los accionaris”, çò dison.
 
Apple lor a respondut que dempuèi l’an 2008 quita pas d’ofrir d’espleches als parents perque contraròtlen çò que fan los mainats amb los mobils.
 
Ça que la, es de mai en mai evident que fòrça enfants passan tota la jornada sul telefòn mobil e degun sap pas encara quina repercussion i aurà sus lor desvolopament personal. S’amb lo temps se demostrèsse que las societats tecnologicas coma Apple o Google, e los rets socials coma Facebook, Instagram o Tumblr meton al ponch exprèssament d’espleches addictius per que se consume mai, se poiriá passar dins l’avenir que se faguèsse de leis semblablas a las del tabac, e quitament que se deguèsse compensar las victimas d’aquelas dependéncias.