L’occitanitat se bolega en sosten a Mireia Boya. L’èx-deputada occitana del Parlament de Catalonha serà entenduda dimècres que ven pel jutge del Tribunal Suprèm de Madrid. Es acusada de “rebellion”, a causa de son implicacion dins lo referendum del 1r d’octòbre passat d’independéncia que se tenguèt en Catalonha e Aran. L’acusacion per “rebellion” es pas que “l’arma juridica dont abusan lei jutges espanhòus per encarcerar lei republicans catalans”, çò rapòrta Aquò d’Aquí, dins un article en sosten a Boya. Dins aquel sens, lo mesadièr provençal fa un analisi net e clar de la situacion:
   
Boya risca una condemna de 30 ans de preson, e mentre qu’esperarà lo jutjament poiriá èsser liberada jos una nauta caucion o ben encarcerada preventivament coma los quatre presonièrs politics catalans, es a dire los dos presidents de las associacions independentistas e lo vicepresident e lo conselhièr d’interior del govèrn de la Generalitat.
 
 
Marcha de tesas a Les
 
Davant aquela situacion, una accion de sosten se tendrà dimars a Les (Quate Lòcs), vila que Mireia Boya n’es abitanta. S’agís d’una marcha silenciosa ont los manifestants brandiràn de tesas alucadas. Jol lèma “Mireia èm damb tu” los manifestants se trobaràn a comptar de 20h30 sus la plaça de la comuna.
 
 
Autobús a Madrid
 
Qualques oras pus tard, un autobús farà la rota d’Aran vèrs Madrid per acompanhar los ciutadans que se voldràn recampar davant lo Tribunal Suprèm espanhòl e sosténer Mireia. De Barcelona lo cortègi de sosten partirà en tren. Per mai d’informacion podètz contactar lo collectiu Taula per Aran.
 
 
L’occitanitat publica un manifèst
 
Quant a l'occitanisme, qu'a totjorn reconegut lo prètzfach de Mireia Boya per Occitània e l'occitan, ven de se publicar un manifèst signat per divèrsas associacions.
 
Lo manifèst saluda l'accion de Boya e planh las acusacions contra ela e los autres enseguits catalans, qu’a l’ora d’ara seràn a l’entorn de nòu centenats. Los signataris denóncian “la criminalizacion e la repression judiciària d’una partida de la classa politica catalana per sas opinions politicas, l’empresonament de lidèrs de partits e d’associacions ciutadanas,  l’exili d’un president de govèrn”. Dins aquel sens deplora “un sentiment d’arbitrarietat e d’injustícia, al bèl mièg de l’Union Europèa”.
 
Per signar lo manifèst, que publicam en seguida, podètz mandar un email a l’adreiça acc.culturoc@gm.... Tanben lo podètz signar en escrivent a la redaccion de Jornalet o a la dels nòstres confraires d’Aquò d’Aquí, que sostenèm lo manifèst.

 
        
    

fffff		fffff
	Manifèst de sosten a Mireia Boya   La deputada aranesa al Parlament de Catalonha, Mireia Boya, serà menada davant la justícia espanhòla per “rebellion” pr’amor de sa participacion politica al referendum que se tenguèt lo 1r d’octòbre passat.   Lo jutge del Tribunal Suprèm espanhòl, Pablo Llarena, l’a apelada pel 14 de febrièr.   Boya serà seguida puèi d’Anna Gabriel, tanben èx-deputada de la CUP e mesa en examen pel meteis “delicte”.   Lo jutge Llarena decidiguèt lo 22 de decembre passat d’alargar l’enseguida a Mireia Boya, aital coma a d’autras responsablas politicas catalanas coma Anna Gabriel, Marta Pascal o encara Marta Rovira.   Las practicas politicas de l’estat espanhòl nos semblan vengudas d’un autre temps, un temps que fòrça gents avián cregut passat e nos remembran las piègers oras de l’istòria de Catalonha tant coma d’Espanha: la criminalizacion e la repression judiciària d’una partida de la classa politica catalana per sas opinions politicas, l’empresonament de lidèrs de partits e d’associacions ciutadanas,  l’exili d’un president de govèrn, tot aquò manten un sentiment d’arbitrarietat e d’injustícia, al bèl mièg d’una Union Europèa que se targa d’èsser un modèl de liberalisme e de pluralisme politic dins lo Mond.   Nosautres, ciutadans e ciutadanas de l’Union Europèa, occitans e occitanas, declaram nòstre sosten total a Mireia Boya.   Sostenèm Mireia Boya, per aver representat al parlament catalan entre 2015 e 2017, e amb dignitat istorica, la votz d’Occitània, en rendent possible que pel primièr còp dins l’istòria dels estats modèrnes europèus, la lenga occitana ganhèsse una visibilitat publica e politica, dins lo quadre del procès per lo bastiment de la republica de Catalonha, çò que representa un fenomèn d’una portada politica incomparabla amb la situacion desastrosa de la lenga d’òc dins son territòri istoric majoritari, dins la Republica Francesa.   Sostenèm Mireia, dont lo quite nom es portaire de tota una esperança per los òmes e las femnas d’òc, fàcia a las practicas policièras e arbitràrias d’un estat dont las garentidas democraticas cada jorn van mai a la deriva. Accion Culturala Occitana Associacion entara difusion d’Occitània en Catalonha (ADÒC) Cercle d’Agermanament Occità-Català (CAÒC) Chambra d'Òc Corròp per Aran Òc Malhòrca Assemblada Nacionala Occitana (ANÒC) Partit de la Nacion Occitana (PNO) País Nòstre Republica Federala Occitana República de Nissa Òc en París Fundació Randa - Lluís M. Xirinacs Grop Mirabèl   Ferriol Macip Fredo Valla (realizaire) Gerard Funés Martín-Canyadell Gerard Joan Barceló Hug de la Rosa Ruperto (cònsol de la comuna de Les) Matiàs Gibèrt Michel Borsotto Patric Roux (conselhièr regional) Rafèu Sichel-Bazin Augustin Lefils Remèsi Fermin-Trocha Terric Lausa Victor Capdet Montesinos Joan-Jaume Donnat (Seta) Patrici Pojada Gerard Cairon (Florentin d'Albigés) Eve Ressaire Joan Vall Eric Sonié (Laurós) Gemma Escur i Gelabert Danís Fize Felip Gibèrt (Vilamanda) Bernat Menetrier-Marcadal (Tarba) Tònho Castet (Vilamòs) André Thévenot (Tornafuèlha) Joan-Cristòu Dordet Núria Ontiveros Briansó Gabriel Balloux Jean-Marc Pellet (Sant Remèsi) Artur Quintana i Font Antoni Moga Ferrés Felip Bonnet Reinat Matalòt Joan-Pau Capdecoma Olivièr Daillut-Calvignac Francis Timoner Gemma Fernández Carrión Laia Fàbregas Castells Joan-Pèire Alari Dídac Martorell Paquier Luca Tillier (Arpitània) Ermengol Marcos Forniol Pol Aumedes Morell Joan Codina Vila Christine Findal (Marselha) Hervé Andres Ciril Joanin Héliane Longère (Marselha)