“La justícia espanhòla es a mand de far desaparéisser tota una generacion politica catalana”, ço publica Equinox. Segon lo magazine francés, lo procès gigantesc qu’es a mand de se téner per jutjar la declaracion d’independéncia de Catalonha e Aran “deimarà de desenats d’òmes e de femnas politicas”. Ansin, afirma que “d’unes riscan de passar de decennis en exili, d’autres en preson, un grand nombre recebràn de duras multas e la totalitat seràn probablament inelegibles a vida”.
 
Delà los actuals quatre presonièrs politics —l’èx-vicepresident de la Generalitat Oriol Junqueras, l’èx-conselhièr de l’Interior, Joaquim Forn e los dos presidents de las associacions independendistas Jordi Sànchez e Jordi Cuixart— Equinox fa una lista dels elegits que son en exili, dels que son en libertat susvelhada e dels que son convocats en justícia, dont l’occitana Mireia Boya que deman se deu presentar davant lo jutge del Tribunal Suprèm de Madrid.
 
De son costat, VilaWeb assegura que los represalhats son mai de nòu cents, dins un article que revisa cronologicament totas las accions de l’estat espanhòl que cèrcan de reprimir l’independentisme dempuèi que se comencèt de preparar lo referendum del 1r d’octòbre passat.