capçalera campanha

Actualitats

InternacionalPolitica

Madrid: Mireia Boya fa uèi sa deposicion davant lo Tribunal Suprèm

L’èx-deputada occitana o fa sens renonciar a sas conviccions e en tot defendre lo referendum del 1r d’octòbre passat

L’èx-deputada occitana de la CUP, Mireia Boya, farà uèi sa deposicion davant lo magistrat del Tribunal Suprèm espanhòl, Pablo Llarena. Ela o farà sens renonciar a sas conviccions e en tot defendre lo referendum del 1r d’octòbre passat. “Auem vist que non servís pas ad arren abjurar dera ideologia pròpria entà evitar era preson”, çò assegurava aquesta setmana dins una conferéncia de premsa en tot remarcar: “Hérem un referendum e le guanhèrem. Revendiquem-ac!”.
 
Atal, l’èx-deputada aranesa se presenta uèi davant lo jutge conscienta de totas las probabilitats de tornar pas a l’ostal après sa deposicion, coma s’es passat amb d’autres elegits independentistas entenduts per aquel tribunal. Ça que la, Boya se mostrava convencuda de sa fermetat davant lo jutge: “S’entri en preson, ne sortirè sonque quan ajam era Republica”, çò diguèt.
 
 
Presentar una defensa politica
 
La tòca de Mireia Boya es de presentar una defensa politica davant las acusacions per “rebellion” e “sedicion” qu’aquel tribunal pòrta contra ela, en comprenent que s’agís d’acusacions politicas que lor objectiu es d’“esténer era pòur”. Es justament per aquela rason que Boya e sos avocats an emés la possibilitat de far una apelacion davant la justícia internacionala.
 
“Era causa deth Tribunau Suprèm ei bastida sus un arrepòrt dera Guàrdia Civila pòc fondamentat, parciau e interessat, que bastís un relat de violéncia que non existic”, çò assegura Boya, del temps que la còla juridica que l’acompanha soslinhan la manca de garentidas judiciàrias e parlan de “drech penal de l’enemic”.
 
Boya es la primièra a declarar del segond grop de personas enseguidas pel referendum del 1r d’octòbre. Lo jutge Llarena  —qu’instrutz la procedura contra plusors sobeiranistas acusats de rebellion, sedicion e malversacion de fonzes, dont los que son encarcerats— decidiguèt lo 22 de decembre passat d’alargar l’enseguida a Mireia Boya, Anna Gabriel, Artur Mas, Marta Rovira, Marta Pascal e Neus Lloveras. Las nòvas investigacions judiciàrias se prononcièron en seguida del resultat de las eleccions en Catalonha e Aran l’endeman qu’aquestas aguèron tornat daissar una majoritat absoluda de las fòrças independentistas al parlament. Alavetz Boya diguèt que se tractava de venjança “sens cap de dobte”.
 
Jornalet raportarem uèi quin serà lo sòrt de Mireia Boya tanlèu coneisserem la decision del jutge.


— Vilaweb rapòrta en dirècte


Acamps e mòstras de sosten




   
   
   
   
   
   
   
   



abonar los amics de Jornalet
 

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: SIDILLÀ

Comentaris

Pirolet
5.

#2 E òc! Se parla tant d'Espanha sul sicut de l'Inquisicion que fòrça mond sap pas (o a doblidat) que foguèt creada en Occitània.

  • 3
  • 0
francesc palma
4.

Tamben visca la CUP e tots los qu' han anat a recolzar-la a Madritis. Urrà !
Visca Mireia. Urrà !

  • 2
  • 0
Redaccion
3.

Mireia Boya ei estada metuda en libertat sense mesures de contraròtle. Lèu qu'ac arreportaram sus Jornalet

  • 9
  • 0
Franc Bardòu
2.

Delicte d'opinion ! Simulacion de justícia… Per non s'enganar tròp luènh subre aqueste camin asardós, ganhariá, los jutges espanholistas, a tornar legir lo Manual de l'Inquisitor de Bernat Gui…

  • 8
  • 0
Jordi
1.

La primera política occitana empresonada a l'estat espanyol?

  • 2
  • 0

Escriu un comentari sus aqueste article