Lo Conselh Permanent de l’Institut d’Estudis Araneses – Academia aranesa de la lenga occitana (IEA-AALO) avertís que “sense un tractament de preferéncia, sense proteccions pariones, que compensen eth desequilibri existent, respècte des autes dues lengües oficiaus, era lengua pròpria d’Aran ei menaçada de rapida desaparicion”. Es çò qu’emana del comunicat de l’institucion aranesa que condemna e planh la decision del Tribunal Constitucional espanhòl qu’aquesta setmana a anullats los articles de la Lei de l’Occitan que declaravan la lenga nòstra preferenciala en Aran.
 
L’IEA-AALO critica “un incompliment der estat espanhòu respècte des disposicions dera Carta Europèa des Lengües Regionaus e Minoritàries (ratificada per Espanha eth 2 de hereuèr de 2001)’’ e remarca qu’“era lengua occitana ei un patrimòni internacionau qu’er Estat compartís damb tres estats europèus mès e qu’aurie d’èster objècte de major reconeishement e promocion.
 
Enfin, l’acadèmia aranesa , en avalorar la senténcia del TC que declara inconstitucional lo mot ‘‘prefencial’’ de la Lei 35/2010 de l’occitan, sollicita de las institucions catalanas e aranesas qu’aquela ‘‘anullacion de la preferéncia lingüistica de l’aranés li servisca a el coma motor per aumentar la preséncia de l’aranés e la siá potenciacion e promocion’’ tant en Val d’Aran coma Catalonha. Segon l’Institut, s’es fach aital pendent los darrièrs 40 ans malgrat que la lenga occitana en Aran patisca una situacion ‘‘d’anormalitat lingüistica e de desequilibri’’ a respècte del catalan e de l’espanhòl.