La Confederacion Païsana d’Occitània manifestèt dimenge passat a Tolosa per denonciar las mesuras de bioseguretat impausadas pels darrièrs dos episòdis de la crisi aviària, e per defendre los circuits corts. Ongan, dins sa tresena protèsta en sosten de l’elevatge, lo sindicat païsan del centre d’Occitània reclama que s’elimine pas las indemnitats europèas a las zònas desfavorizadas.
 
Las aucas foguèron las protagonistas de l’eveniment. Simbòls d’una agricultura bordièra e rasonada, los païsans marchèron amb las aucas. “Coma cada annada, las nostas aucas que vienen cridar. Eras que donan l’alèrta tà díser que l’agricultura païsana ei en perilh. Defendem las 70 000 bòrdas d’Occitània, aqueras petitas estructuras que prefereishen trabalhar en circuit cort entà compensar la massa de produccion que hèn pas”, çò explicava a La Dépêche Sylvie Colas, copòrtavotz de la Confederacion Païsana d’Armanhac.
 
Quat a la question de las zònas desfavorizadas lo sindicat afirma que las pichonas estructuras son tanben concernidas. “Dens cèrtas zònas deu noste territòri, non podem pas har auta causa que l’elevatge. S’òm nos lhèva las ajudas, qu’ei dobla pena! E s’òm hornís, per la poralha, la crisi aviària qu’ei tripla pena”, çò precisa Colas.
 
 
Contramanifestacion animalista
 
De lor costat, los defensors de la causa animala i èran per manifestar lor oposicion a tota forma d’elevatge, e mai que mai s'opausavan a la tonda de fedas que los elevaires faguèron publicament sus la plaça en plen fred.
 
Segon lo rapòrt de La Dépêche, los elevaires e los animalistas intercambièron lors arguments amb calma e cordialitat. "Qu'aurem preferit qu'aqueths militants anèssen manifestar dens las seccions deus supermercats on los animals e vienen d'elevatges industriaus mèslèu que de s'atacar a nosauts, païsans paficistas que defendem lo noste terrador", çò planhiá Colas.