Dakar e l’MFDC se reüniguèron a Roma jols auspicis de la Comunautat de Sant’Egidio. L’associacion catolica ditz que la reünion foguèt “serena e constructiva” e anóncia mai de convèrsas. En julhet passat, lo cap de la guerrilha independentista aviá manifestat qu’èra per una sortida negociada del conflicte.

Las delegacions del govèrn de Senegal e del Movement de las Fòrças Democraticas de Casamança (MFDC) s’amassèron la setmana passada a Roma per explorar de vias cap a la patz dins aquel territòri african. La reünion se faguèt jols auspicis de la Comunautat de Sant’Egidio, qu’o a fach conéisser mejançant un comunicat.
 
Segon las informacions d’aquela associacion catolica, “l’atmosfèra de las convèrsas foguèt serena e constructiva”. Las doas delegacions convenguèron de s’amassar un autre còp dins la capitala italiana per contunhar las convèrsas.
 
La delegacion senegalesa èra nomenada pel president Macky Sall (en carga dempuèi abril passat), mentre que los representants de l’MFDC èran nomenats per Salif Sadio, un dels caps del movement armat independentista. Sadio, en una entrevista lo mes de julhet passat, s’èra mostrat partisan de canalizar las convèrsas de patz a travèrs de la Comunautat de Sant’Egidio.
 
L’MFDC prenguèt las armas en 1982 per revendicar l’independéncia de Casamança. Lo grop armat considerava que Senegal discriminava aquel territòri, que geograficament es gaireben isolat de la rèsta del territòri estatal per la preséncia de la Republica de Gàmbia. En 2004, qualques faccions de l’MFDC signèron un acòrdi de patz amb Dakar, sens cap de contrapartida politica. D’autras faccions o acceptèron pas e an mantengut la lucha armada fins ara.
 
 
 
 
 
 
 
 
Aqueste article ven del jornal catalan Nationalia.cat, amb qui Jornalet a un acòrdi de cooperacion.