Actualitats
Aran se mobiliza pels presonièrs politics
Durant l'acamp, los manifestants portavan de panèls que revendicavan la proteccion de l'occitan en Aran
Divendres fasiá 4 meses d'encarceracion per Jordi Cuixart e Jordi Sánchez, los presidents de las doas principalas associacions independentistas, Òmnium Cultural e l'Assemblada Nacionala Catalana. A l'ocasion d'aquela data, de milièrs de personas manifestèron en Catalonha e Aran.
Un centenat de personas a Vielha
Un centenat de personas se recampèron sus la plaça de la glèisa de Vielha, a l'ocasion d'aquela trista data, en tot demandar la liberacion de totes los presonièrs politics, çò rapòrta Aué TV. I èra present lo deputat d'Amassa per Catalonha, Jordi Turull, qu'el tanben foguèt embarrat 32 jorns en preson. Dins son discors, Turull remarquèt que non se podiá pas acceptar coma un acte abitual que i aguèsse de mond en preson per lors idèas politicas.
En mai d'aquò, Turull afirmèt que lo sol biais de desencalar la situacion politica actuala èra de respectar los resultats electorals del 21 de decembre passat. Dins aquel sens afirmèt que Carles Puigdemont seriá lo seguent president de la Generalitat.
Per la proteccion de l'aranés
Durant l'acamp, los manifestants portavan de panèls que revendicavan la proteccion de l'occitan en Aran. Una revendicacion qu'es tornada a las carrièras aranesas après que lo Tribunal Constitucional espanhòl anullèt los articles de la Lei de l'Occitan que priorizan l'usatge de l'aranés dins las administracions publicas del país de cap de Garona.
L'eveniment s’acabèt amb l'interpretacion de l'imne occitan.
En Catalonha per l'unitat de l'independentisme
Per çò qu'es de Catalonha, de milièrs de personas empliguèron las carrièras e las plaças del país. A Barcelona i aguèt una marcha qu'anèt del palais de la Generalitat fins a l'anciana preson Model, un simbòl de la repression franquista.
Al delà de revendicar la libertat dels presonièrs politics, dins la marcha s'ausiguèt de crits que reclamavan l'unitat de las formacions politicas independentistas e revendicavan lo modèl de l'escòla catalana, que la veïcularitat de la lenga del país es ara en perilh.
Los lums dels telefòns mobils illuminavan la manifestacion en creant un efièch espectaclós.
Missatge des de la presó:
— Jordi Cuixart (@jcuixart) 16 de febrer de 2018
Gràcies a tots els qui ens il·lumineu d’esperança. No hi ha justícia ni democràcia sense llibertat! https://t.co/dbYjGxAG4a • pic.twitter.com/y9KCxsHMiI
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Sèm ciutadans del monde e sèm pas indifferents a l'actualitat, e subretot als còps portats a la democracia dins un païs vesin, notadament la preson preventiva a durada indeterminada pr'amor d'opinion politica...
Qu'aquò s'ignòra e escandoliza pas dins l'opinion de França...
jornalet desvelopa l'esperit critic, com un periodic normal.i
#4 quiòc, perdon per mas aproximacions.
Per contre, Aran aquò representa la medisha poblacion com Lengon e Tolena. Héser la comparason entre la quantitat d'articles pertocant ambdus parçans.
Vòli pas contestar l'importància d'Aran per Jornalet e per Occitània tota -- pasmens lo desequilibri es tant flagrant que me'n sentissi grèu. Desolat, me semblava que Jornalet avè ambicions nacionalas e non pas de gaseta localista. Me bremba la granda epòca d'Anaram au Patatrac e de Libertat, passant lo temps a gaitar a Catalonha shens jamei se mainar qu'a nòste tanben i a una actualitat. E qu'ende conscientizar e bastir nacion analisar aquesta actualitat es necessari, hòrt mei que devisar deu vesin shens cès.
#1 Visca Jornalet !
Per astre, i a a Catalonha jornals digitals e de papièr en catalan e en occitan, fòrça plan faits : Jornalet, Ara, Vilaweb, el Punt, e mantuns diaris regionals, Diari de Girona, El Segre , eca...
Cada matin, legissi Jornalet, Vilaweb, Ara, El Punt e agachi TV3.
Me congosti deu professionalisme deus jornalistas catalans, en prumèr lòc de Ferriol MacIp.
Aquò es mei interessant i formator que lo passadisme e lo folklorisme de mantuns mitjans occitanistas !
Per véser un autre exemple deu professionalisme catalan , cau anar, au mens un còp, a"la universitat catalana d'estiu "(UCE) de Prada de Conflent (Se debanarà ongan, dambe la Generalitat aus mans del Govern espanhòu e lo 155- si non serà un desastre pels patriotas catalans e occitans - corses d'Aïtor Carrera e Jaume Figueras i Trull))
#3 Oulalalalala ! Non, non ! Fauç, non, non, fauç, tot fauç ! Qu'es defenut de díser causas atau ací, aïe, aïe, aïe, praube òmi ! Qu'èm hrairs TOTS, OK ??? CLAR ??? OK ??? MEDISHA cultura, tots e pertot, OK ??? As comprés, miladiu ???? Fasciste, tè !
E qu'es defenut tanben, d'escríver "viva" au lòc de "visca". Qu'es un GALLICISME ! As comprés, hilh deu diable, un GALLICISME, qu'es grèu aquò, as comprés, qu'es GRÈÈÈÈU !!!
#1 Benlèu avètz pas remarcat:
— qu'Aran se situa AL NÒRD de la cresta dels Pirenèus,
— qu'Aran es un territòri occitan e qu'es ben normal de ne parlar dins Jornalet,
— que se tracta de defendre l'avenir institucional e social de la lenga occitana en Aran.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari