Après qu’aguèt passat 11 ans en preson per aver avortat, daissèron en libertat una femna del Salvador dijòus passat. Li dison Teodora Vázquez, e l’avián condemnada a 30 ans de preson, mas ara la Cort suprèma d’aquel país a decidit de li comudar la pena per “de rasons de justícia, d’equitat e d’aspècte juridic”.

“Ai perdut fòrça ans de ma vida, mas soi aürosa perque començarai una vida nòva. Trabalharai, lucharai per que d’autras femnas condemnadas injustament per de cases coma lo mieu pòscan recobrar lor libertat”, çò diguèt Vázquez en sortir de la preson.

Vázquez a ara 34 ans e a aprofechat tot aquel temps en preson per estudiar. I intrèt sens aver acabat los estudis primaris, mas a seguit quitament los estudis segondaris e ara vòl anar a l’universitat.

La libertat es arribada a un moment inesperat. Teodora Vázquez aviá totjorn revendicat son innocéncia, mas en decembre passat lo Tribunal Segond de Senténcia de San Salvador aviá ratificat la senténcia de 2008. Mas ara la Cort Suprèma a donat rason a Vázquez en argumentant que “la pròva scientifica permet pas de determinar se i aguèt qualque accion volontària que menèsse a la mòrt del nenet en gestacion”.

Lo Salvador es un dels pauques païses ont l’avortament es completament enebit. Los autres son Andòrra, Haití, Honduras, Malta, Nicaragua, Surinam e Chile.

Son enfant nasquèt mòrt

En 2007, Teodora Vázquez telefonèt als secorses dempuèi los comuns de l’escòla ont trabalhava. Èra prens de gaireben nòu meses. Segon ela, recebèt pas cap de suènh medical, patiguèt una fòrta emorragia e l’enfanton nasquèt mòrt. Foguèt acusada d’aver tuar son mainadet e condemnada a 30 ans de preson. Es estada encarcerada 10 ans e 7 meses.

Lo còde penal del Savador prevei de penas de 2 a 8 ans per aver avortat, mas dins lo cas de Teodora Vázquez los jutges considerèron qu’aquel afar èra un “omicidi agravat”, e la puniguèron de 30 ans de preson.

Ara, la manca de pròvas scientificas per demostrar que la maire tuèt l’enfanton, l’a mesa en libertat. Pasmens, la justícia l’a pas declarada innocenta ni mai li an pagat d’indemnitats ni prepausat cap de compensacion per tot aquel temps qu’es estada injustament empresonada.

Un país ont los viòls son abituals

Quand Vázquez sortiguèt de la preson, l’esperavan sos amics e parents, e tanben d’activistas en favor de despenalizar l’avortament.

Lo Gropament Ciutadan per la Despenalizacion de l’Avortament an tornat far una seguenta crida “per que Lo Salvador quite d’èsser d’aquela minoritat de païses qu’encara tenon aquelas leis contra las femnas”.

De remarcar qu’aquel país a un sistèma de santat fòrça deficient e que los viòls i son abituals, e doncas l’enebicion de l’avortament afècta sustot las femnas joves.

A l’ora d’ara al Salvador i a 27 femnas encarceradas jos l’acusacion d’aver avortat.