Lo 16 de febrièr passat, nos quitèt lo pedagòg e escrivan nimesenc Jòrgi Gròs a l’edat de 95 ans. Deman auràn luòc sos obsèquis: un omenatge li serà rendut a 11h al crematòri de Nimes, e los que voldràn vesitar lo còrs abans o poiràn far de 9h30 a 10h30 a la cambra funerària Pascal Leclerc, 47 bd Talabot a Nimes.
 
Amic personal del pedagòg occitan Celestin Freinet, Jòrgi Gròs foguèt un grand regent e vulgarizaire de sas tecnicas. E mai, son amor per la lenga occitana portèt un avançament a l’educacion en lenga nòstra. Ara, una de las doas calandretas de Nimes ten son nom. La FÈLCO e lo CRÈO Lengadòc an comunicat lor dòl e amb sa collèga Claudina Paul rendon un primièr omenatge a Jòrgi Gròs en partejant sa biografia dins aqueste ligam.
 
Gròs cresquèt en 1922 a Nimes al sen d’una familha occitanofòna. En aquel temps èran fòrça popularas las faulas e los poèmas d’Antòni Bigòt. Tot aquel encastre influencièt Jòrgi Gròs dins sa creacion literària ont podèm soslinhar Lo batèu de pèira (1984), Còntes de la Fònt de Nimes (1997) e Lei bugadieras blavas (2014). Sos contes son per la màger part destinats als dròlles mas fòrça s’adreiçan a un public adulte.