La campanha republicana per las presidencialas estatsunidencas del 6 de novembre s’es embroncada a un obstacle nòu. S’agís de qualques declaracions sus l’avortament qu’a fach lo candidat al Senat per l’estat d’Indiana, Richard Mourdock.

Dins un debat televisiu amb d’autres candidats per New Albany, lo candidat a senator deviá respondre a la question se lo viòl seriá un cas acceptable per avortar. E respondèt: “me soi avisat que la vida es un present de Dieu e, e mai se comença amb una causa òrra coma un viòl, es perque Dieu vòl qu’aquò se passe”. Pasmens l’“unica excepcion per l’avortament es que la maire siá en perilh”.
 
Lo candidat republican a l’Ostal Blanc, Mitt Romney, se desmarquèt lèu de las declaracions polemicas. Lo sieu pòrtavotz manifestèt: “Lo governador Romney es pas d’acòrdi amb los comentaris de Richard Mourdock, que rebaton pas sas opinions.” De fach, Mourdock, una de las figuras del movement conservador Tea Party, a ensajat de cambiar sos mots davant la polemica desfermada, mas en cap de cas a demandat d’excusas per çò que diguèt.
 
“Parlèri amb lo còr e segon mos principis”, çò justifiquèt Mourdock. “Dieu crèa la vida, e es çò que voliái dire. Dieu vòl pas lo viòl, e en cap de cas suggerissiái que la volguèsse, un viòl es una causa òrra”, çò esclarziguèt.
 
Mas la campanha de Barack Obama a ja emplegadas las declaracions de Mourdock per questionar l’actitud republicana cap a las femnas, una categoria que los democratas lor consagran plan d’esfòrces. L’opausant democrata a Mourdock, lo congressista Joe Donnelly, diguèt que lo viòl es “un crime abominable dins totes los cases” e que “lo vertadièr Dieu vòl pas que jamai se produsisca cap de viòl”. La presidenta del Comitat Nacional Democrata, Debbie Wasserman Schultz, qualifiquèt las paraulas de Mourdock d’“indignantas e degradantas per las femnas”.
 
En Missorí, un autre republican, lo candidat a senator Todd Akin, desfermèt tanben la polemica quand diguèt que caliá distinguir entre los viòls “reals” o “autentics” e los qu’o son pas, perque los primièrs, en “de raras escasenças, acabavan en emprenhament”. Aquelas paraulas supausèron la fin de sa carrièra politica.