Lo Senat francés examinèt lo 13 de febrièr passat lo projècte de lei organica qu'establís las modalitats de vòte del referendum d'independéncia de la Nòva Caledònia que deu aver luòc al pus tard en novembre que ven. Los senators se son meses d'acòrdi, en mens de doas oras, sus la composicion de las listas electoralas, çò rapòrta France Info. Ara la lei deu passar a l'Assemblada francesa.
 
 
L'acòrdi prevei l'inscripcion d’11 000 personas de mai —dont la majoritat de canacs— a la lista restrencha dels caledonians que poiràn votar a prepaus de l'independéncia d'aquel territòri, segon Nationalia.
 
 
Un territòri de descolonizar
 
La Nòva Caledònia es un territòri, situat dins l’ocean Pacific, a 17 000 quilomètres de la metropòli, que ten una autonomia politica dempuèi 1999, çò es: compren un govèrn, un parlament (lo Congrès) amb competéncia legislativa e un Senat costumièr. Ça que la, oficialament es considerat coma un territòri non autonòm per l’ÒNU, e que doncas se deu descolonizar, e se pensa que lo referendum deuriá èsser util a aquela tòca. S’après aquel vòte ganha pas l’independéncia, l’Acòrdi de Nouméa prevei la convocacion d’un segond referendum sus la meteissa question al tèrme d’un an e mièg.
 
Lo vòte poiriá menar a la creacion d’un nòu estat independent de 18 000 km² amb un pauc mens de 270 000 abitants, e mai se los sondatges fan pensar qu’a l’ora d’ara lo “non” benefícia d’un avantatge confortable. Cossí va que sián arribats al referendum d’autodeterminacion? Que se pacha? Quin es lo contèxt general de la Nòva Caledònia? Aquestas questions, ensagèrem de i respondre dins un article publicat en novembre passat que podètz trobar sus aqueste ligam.
 
 

Introduction de la séance publique sur le projet de loi organique relatif à l'organisation de la consultation sur l'accession à la pleine souveraineté de la #NouvelleCalédonie par @AnnickGirardin : "La Nouvelle-Calédonie est une priorité pour le gouvernement et pour @loutremer" pic.twitter.com/RqB1Wvks1j

— Senat_direct (@Senat_Direct) 13 de febrer de 2018