Elfed Wyn Jones, un boriaire de 20 ans, comencèt dimars passat una cauma de la fam d’una setmana per reclamar al govèrn britanic lo transferiment de las competéncias de radiotelevision a l’Assemblada Galas. La protèsta fa partida d’una campanha de portada mai larga, segon çò que rapòrta la principala associacion de defensa de la lenga galesa, Cymdeithas. En genièr, 12 activistas faguèron una cauma de la fam per la meteissa rason, mas aquò durèt sonque una jornada. La campanha se debana dins la paur que Londres retalhe lo finançament de la sola television en lenga galesa, l’S4C.
 
La radiotelevision fa pas partida de las 20 competéncias que ten lo País de Galas. Mas Cymdeithas remembra que dins lo país existís solament una television en galés del temps que n’i a de centenats en anglés. L’organizacion considèra que s’aumentarà las emissions en galés solament quand la competéncia serà transferida.
 
En genièr passat, mai de 40 artistas e universitaris galeses mandèron una letra a la primièra ministra britanica, Theresa May, per tal de sollicitar lo transferiment de la competéncia. Mas lo govèrn britanic considèra que segon lo volum economic del sector es melhor que la competéncia demòre dins las mans de Londres.
 
 
 

---

Aquesta nòva es adaptada de Nationalia amb qui Jornalet ten un acòrdi de cooperacion