Lo poèta, traductor e editor peiregòrd Bernat Lesfargas moriguèt ièr a 93 ans. Nascut a Brageirac en 1924, foguèt un poèta de tria en lenga occitana. Ne podètz saber quicòm, per exemple, dins lo sit de las Edicions Jorn. Tanben foguèt un dels traductors pus importants en francés de las òbras màgers de la literatura catalana, mai que mai del sègle XXn. Èra licenciat en estudis iberics de l'Universitat de la Sorbona de París.
 
Engatjat dins l'occitanisme, Lesfargas èra membre de l'Institut d'Estudis Occitans tre sa creacion en 1945, e participèt als Amics de la Lenga d’Òc, associacion que n'èran membres Pèire-Loís Bertaud, Joan Lesaffre, Joan Mosat, Enric Espieut e Bernat Manciet.
 
Per l'ensemble de son prètzfach occitanista recebèt la Crotz de Sant Jòrdi de la Generalitat de Catalonha en 1999, lo Prèmi Joan Bodon en 2005 e lo Prèmi Pompeu Fabra en 2010.
 
En 2006, Bernat Lesfargas signèt una convencion amb l'Universitat Autonòma de Barcelona (UAB) per tal de cedir una part de son fons epistolar e bibliografic a l'universitat que ne faguèt puèi un inventari, una catalogacion e una numerizacion. L'Archiu Occitan d'aquela universitat catalana a exprimit publicament son dòl "a la familha mas tanben a la societat e a la cultura occitanas a la quala  [lor] admirat Bernat consagrèt tota sa vida". En omenatge, li seràn dedicadas las 23as Jornadas Occitanas de l'Archiu Occitan de l'UAB.