Lo malhum del país, e quitament de l’estat, bolega plan, mai que mai sus Twitter e sus Facebook. Aquela fotografia de doas gojatas, Júlia e Auriana (“Julia” e “Auriane”), que se fan un poton, es venguda un simbòl e es a córrer pels rets socials d’un biais trepidant. Ja d’unes que i a la gausan comparar amb la famosa fotografia de Doisneau.

Aqueste còp se passèt a Marselha. Dins la capitala de Provença, marchava una d’aquelas 75 manifestacions que se fasián per tot l’estat francés contra los maridatges omosexuals, convocadas per l’associacion Alliance Vita. Aquela associacion demandava que los manifestants anèsson totes abilhats de la meteissa faiçon. A Marselha, per exemple, èra solament permés de s’abilhar amb las colors blanca e ròsa.
 
La manifestacion aviá començat amb qualques protèstas isoladas de gents que defendián lo drech al matrimòni omosexual. Un fotograf de France Presse, Gerard Julian (“Gérard Julien”), vegèt doas gojatas plantadas davant los manifestants a se far un poton.
 
Gerard Julian captèt lo moment, quitament amb las minas d’estonament de qualques manifestants. Un pauc puèi, un jornalista de la revista Têtu publiquèt la fòto sus Twitter, e paucas oras puèi venguèt lo tèma principal e una de las piuladas mai partejadas de l’istòria. L’etiqueta #baiserdeMarseille (“poton de Marselha”) cor sens s’arrestar e amassa totas las reaccions.
 
La meteissa revista, una de las mai influentas entre lo public omosexual, trobèt las doas gojatas e las entrevistèt. S’agís pas de lesbianas mas d’eterosexualas; ça que la, avián decidit de se potonejar per contraestar los eslogans dels manifestants opausats al matrimòni omosexual: “Es un gèst de solidaritat pur e simple”, çò diguèt Júlia.
 
Fin finala, en vesent la dimension qu’a presa aquela la fòto, l’autor a escrich sul blòg de l’agéncia lo relat del fach e cossí l’a viscut.