Aperaquí 40 000 personas manifestèron lo 17 de febrièr passat a Estrasborg per exigir la liberacion d’Abdullah Öcalan, la reconeissença d’un estatut per Curdistan e l’arrèst immediat dels bombardaments turcs sus la vila d’Efrîn, çò rapòrta Directa. Los manifestants cridèron d’eslogans coma “Una solucion politica per Curdistan”, “ Erdoğan terrorista” o “Totes sèm antifaissistas”, en francés, anglés o italian.
 
La polícia francesa bloquèt la majoritat dels accèsses a la capitala d’Alsàcia per “de rasons de seguretat”, del temps que la nèu tanben empedissiá fòrça personas de jónher la protèsta. En mai d’aquò, l’impossibilitat d’accedir al centre d’Estrasborg e l’abséncia totala de mèdias internacionals contribuiguèron a rendre invisibla aquela manifestacion. De plànher tanben lo silenci de las institucions europèas sus la situacion de Curdistan.
 
Enfin, se rendèt public un comunicat que sollicitava de la comunautat internacionala l’intervencion contra l’ocupacion turca de Rojava. Se legissiá de manifèstes de solidaritat amb lo pòble curd e se commemorava lo 19n anniversari del “complòt internacional contra lo cap curd Abdullah Öcalan, sequestrat e encarcerat dins l’illa-preson d’İmralı”, coma denonciava Sivan Zerdesti, membre del Congrès Nacional de Curdistan. Segon de fonts del movement curd, fa mai d’un an que “i a pas cap d’evidéncia qu’Öcalan siá embarrat dins la meteissa preson o quitament pas que siá encara en vida”. D’efièch, dempuèi abril de 2015 degun ne sap pas res d’el.
 
Aquela manifestacion metèt lo ponch final a la segonda Marcha Internacionala en Solidaritat amb lo Pòble Curd, que la velha s’èra acampada davant lo sèti de l’ÒNU a Genèva.
 
Tanlèu acabada la manifestacion, mentre que la majoritat dels participants èra de retorn, un dels autocars del Partit de l’Union Democratica (PYD) de Rojava que se trobava parcat als environs de l’encencha de l’acte, foguèt victima d’una ataca d’un grop faissista turc.