Lo Conselh General d’Aran aprovèt lo 28 de febrièr passat una mocion “en favor der impuls e proteccion der aranés coma lengua pròpria d’Aran”. Aquel tèxt l’aprovèron a l’unanimitat los conselhièrs de totas las fòrças politicas representadas a la cambra aranesa, e contèsta la senténcia del Tribunal Constitucional espanhòl que cancèla los articles de la Lei de l’Occitan segon los quals la lenga del país es d’usatge preferencial per las administracions dins la Val d’Aran. Aquela lei foguèt aprovada en 2010 pel Parlament de Catalonha, mas en 2012 lo govèrn espanhòl del Partit Socialista faguèt apèl davant la cort constitucionala.
 
 
Amb la mocion aprovada pel Conselh General d’Aran, se demanda una seguida de mesuras, per exemple que la Generalitat de Catalonha pòrte 300 000 èuros al govèrn d’Aran per que pòsca aviar “totes aqueres accions qu’incrementen er emplec sociau dera lengua aranesa e hèr-la mès presenta e mès viua, non solaments ena Val d’Aran mès tanben dehòra deth territòri”. E mai, lo tèxt considèra la creacion d’una “comission der aranés” designada pel Conselh General d’Aran.
 
Lo sindic d’Aran, Carlos Barrera, expliquèt que se fariá arribar aquela mocion als conselhs municipals de la Val d’Aran, al govèrn de la Generalitat de Catalonha e a la Deputacion de Lhèida; prepausarà a las comunas aranesas “que s’aderisquen ad aguest plan d’impuls der aranés”.
 
 
Letra al ministre de l’educacion
 
Pendent la sesilha, lo sindic d’Aran expliquèt qu’aviá enviada una letra personala al ministre de l’educacion e la cultura espanhòl, Íñigo Méndez de Vigo, ont exigissiá d’el lo respècte de la lenga dels araneses e li disiá que demandèsse excusa al pòble d’Aran “dempús des sues desgraciades e simplistes paraules sus er aranés en ua responsa en Senat. Paraules que non son pròpries d’un ministre deth govèrn der estat”.
 
Lo ministre espanhòl diguèt fa qualques jorns al Senat de l’estat, que “lo sol risc qu’an los que parlan aranés son las avalancas”, en responsa a una question pausada per una senatritz d’Esquèrra Republicana de Catalona que planhiá la despriorizacion de l’occitan en Aran.
 
Aquelas paraulas desfortunadas an provocada l’indignacion en Aran. Ansin, lo collectiu Lengua Viua a convocada una manifestacion lo 24 de març venent per denonciar las atacas que patís la lenga nòstra en Val d’Aran de part de las institucions espanhòlas.