Mentre que los bulletins de vòte finisson d'èsser comptats, lo populista Movement Cinc Estelas (M5E) es lo partit pus votat a las eleccions generalas de ièr en Itàlia. Pasmens, la soma dels tres partits de la drecha los despassa, e amb un fòrt estonament perque l'ultradrechista Liga compta fòrça mai vòtes qu'Anem Itàlia, lo partit de Silvio Berlusconi.
 
Un factor interessant es que la mapa d'Itàlia demòra fòrça marcada amb una clara victòria del M5E al sud del temps que la Liga s'impausa al nòrd de l'estat. Lo resultat de l'M5E a la Gàrdia es fòrça naut amb mai del 45% dels vòtes. Las Valadas an votat majoritàriament per la drecha; entre los electors de Coni s'es impausada la Lega amb gaireben lo 48% dels vòtes mentre qu'a Pineròl ganha Anem Itàlia amb un pauc mai del 37% dels sufragis.
 
 
Segon lo nòu sistèma electoral, cal lo 40% dels vòtes per formar un govèrn, çò qu'a favorit la formacion de coalicions e d'alianças. Amb las donadas actualas, que son pas encara definitivas, la drecha amassada a l'entorn de Silvio Berlusconi atenherà entre 225 e 265 sètis, del temps que l'M5E n'atenherà entre 195 e 235. Lo centresquèrra unit a l'entorn de Renzi n'aurà entre 115 e 155.
 
 
Euroscepticisme
 
Tant l'M5E coma la Liga son fòrça critics amb l'Union Europèa e, ensems, aurián la majoritat dels sètis al parlament. Aquò expliqua que durant tota la nuèch los analistas parlèsson d'una negociacion, e mai se los dos partits l'an dementida.
 
Per l'Union Europèa, lo resultat es problematic, perque Anem Itàlia, membre del Partit Popular Europèu, es estat clarament superat per sos sòcis de la Liga, del temps que lo Partit Democrata, que fa partida del Partit Socialista Europèu, a fach un resultat fòrça marrit. Atal, las doas principalas fòrças politicas europèas son estadas aculadas al parlament italian.
 
 
Una longa jornada electorala
 
Ièr a 23h barrèron los burèus de vòte en Itàlia, après una jornada d'eleccions generalas (parlamentàrias) que cridavan a votar 46 milions de ciutadans de la Republica Italiana, incluses los occitans de las Valadas e la Gàrdia. Los bulletins se son comptats tota la nuèch, en començant pels vòtes del Senat de la Republica (315 elegits), abans los de la Cambra dels Deputats (630 elegits).
 
La participacion, segon lo ministèri de l'Interior italian, es estada del 71,48%, una donada inferiora al 75,2% enregistrat en 2013, ont totun se votava sus dos jorns.
 
 
 

La nostra mappa interattiva dei collegi del Senato su @SkyTG24 si colora sempre di più (i dati arrivano prima rispetto a quelli della Camera)

https://t.co/70YQx5CoE5#Elezioni4Marzo2018#elezioni2018#MaratonaYouTrendpic.twitter.com/fl9HHBP4Rt

— YouTrend (@you_trend) 5 de març de 2018