An començat los trabalhs d’implantacion d’una peirièra a Montmaurin (Nebosan), de matin e sens donar temps al collectiu que protèsta contra aquel projècte de peirièra “que haré càiger lo desvolopament e l’atractivitat deu territòri”. Aqueste dimars passat an fach desbosigar lèu-lèu lo sit de la peirièra. Qualques ecologistas del Collectiu de Montmaurin se n’assabentèron e arribèron sus plaça a 14h, quand lo desbosigatge èra ja acabat.
 
“Estapa venenta, probablament la copa dels arbres. Quora? Qui sap! Benlèu deman, benlèu dins un mes. Coma? Probablament coma uèi, sens avertiment, lèu-lèu un matin de setmana que lo mond es al trabalh e dificil de júnher...”, çò disiá Jeròni Picas, representant del Partit de la Nacion Occitana (PNO).
 
 
Crida a manifestar dimenge
 
Lo Collectiu de Montmaurin crida ara a manifestar dimenge que ven. Malgrat sa reactivitat, a pas pogut empedir lo desbosigatge, mas demandan d’anar dimenge sul sit, amb las colors occitanas, per “mostrar aumens que los ciutadans d’Occitània son pas indiferents a çò que s’i passa”.
 
Lo collectiu se constituiguèt en decembre passat amb la tòca de luchar per la preservacion del patrimòni e “sauvar e valorizar la riquessa environamentau, istorica e culturau”.
 
Lo collectiu pensa de s’associar amb los movements ecologistas del país e sustot fa una crida a tot l’occitanisme “de se mobilizar per empachar que Montaurin sia desfigurat per una peirèra industriau”.
 
 
Defendre lo país, lo patrimòni natural e arqueologic
 
Vòlon defendre l’environament de Montmaurin, en particular las gòrjas de Sava, mas tanben la dignitat del país, car “daissar implantar una peirèra industriala sus Montmaurin mòstra lo mesprètz pregon de l’estat francés rapòrt au patrimòni naturau mès sustot istoric occitan”.
 
En mai d’aquò, defendon un ric patrimòni istoric e arqueologic. Es aquí que se trobèt la Vènus dera Espuga, una figurina del paleolitic talhada en evòri de mamot, que s’expausa ara dins un musèu de París e que li dison en francés “Vénus de Lespugue”. Tanben se i trobèt una mandibula de l’òme de Neandertal que fa partida dels fossils pus vièlhs d’Occitània.
 
Mas sustot cal soslinhar la vila romana de Montmaurin, una de las vilas romanas màgers conservadas dins tota sa superfícia de doas ectaras. Bastida entre los sègles Ir e IVn, es una mena de palais amb quitament un temple, una cort d’onor, de dependéncias, de tèrmas, un frigidarium, un atrium, un bacin, de mosaïcs...
 
 
Espoliacion del patrimòni arqueologic
 
Lo collectiu de Montmaurin nasquèt en seguida de l’espoliacion que la patiguèt lo musèu arqueologic de la vila. Al començament de decembre los gendarmas ne vogèron per fòrça las doas salas davant las protèstas dels oposants. Oficialament, las autoritats volián portar las pèças dins un musèu nòu e public.
 
Dins aquel sens, lo collectiu “demanda que las pèças desviradas per l’estat francés sian tornadas dins un musèu comunau adobat, que l’idèa n’estèc votada peu Conselh Municipau de Montmaurin lo 24 de junh de 2016. Aqueste musèu, restaurat dab un còst rasonable, seriá menat per la comuna dab l’ajuda deus servicis de l’estat”.
 
Lo collectiu afirma qu’es determinat a “engatjar totas las accions adaptadas tant au près de la populacion com au près de las elegidas e deus elegits entà sauvar aqueste patrimòni”.
 
Segon de fonts oficiosas, la voidança del musèu correspondriá a una repression estatala contra los qu’an menat una campanha de lucha contra un projècte de peirièra a Montmaurin.