Un tribunal de Milan a declarat colpable l’èx-primièr ministre italian, Silvio Berlusconi, après l’acusacion de desviament d’argent, a l’entorn de 500 milions d’èuros, en la crompa de filmes e de programas de television de 2001 a 2003. Condemnèron Il Cavaliere a quatre ans de preson per fraudariá fiscala.

En plen debat sus la continuitat o non de Berlusconi dins la vida politica italiana, lo tribunal lo condemnèt tanben a non poder pas ocupar cap de carga publica dins los tres ans a venir e a pagar 10 milions d’èuros d’indemnizacion. Un dorsièr de La Repubblica amassa e recupèra detalhadament totes los procèsses judicials de l’èx-primièr ministre.
 
Berlusconi respondèt a la senténcia en mens de doas oras . Coma ja faguèt en de procèsses precedents, diguèt que se sentissiá victima d’un complòt e qu’aquela condemnacion es “politica, incresabla e intolerabla”. “Mos avocats e ieu cresiam impossibla una condemnacion; es clar qu’aital se pòt pas avançar e cal far quicòm: quand se pòt pas comptar amb l’imparcialitat dels jutges, un país demòra incivilitzat e barbar, e quita d’aver de democracia. Malastrosament, es çò que uèi s’es passat”, çò apondèt Berlusconi.
 
 
Confalonieri absolugut; Agrama condemnat
 
Lo tribunal considerèt prescriches los presumits delictes comeses en 2001, mas non pas aqueles comeses en 2002 e 2003. La senténcia foguèt quitament mai dura que la que lo procuraire aviá prepausada, qu’aviá demandat el tres ans e uèch meses de preson. Per contra, lo president de Mediaset e sòci de Berlusconi, Fedele Confalonieri, foguèt absolgut.
 
L’intermediari cinematografic de Mediaset, Frank Agrama, si que foguèt condemnat. Agrama, lo procuraire de Milan lo definissiá coma lo “sòci oculte del Cavaliere” en la crompa e venda de dreches televisius e cinematografics a l’estrange.
 
 
Un dotzenat de procèsses penals, pas un jorn en preson
 
Ça que la, Berlusconi, qu’es estat ligat a un dotzenat de procèsses judicials penals dins los darrièrs trenta ans, pòt encara esquivar o almens ajornar l’intrada en preson perque pòt recórrer la senténcia en doas instàncias mai. Istoricament, Il Cavaliere a totjorn capitat d’evitar la preson, e mai se l’ex-primièr ministre italian a encara d’autres procèsses en suspens.
 
 
Intrarà pas en preson
 
Lo jutge Edoardo De Avossa, encargat del “cas Mediaset”, a redusit la pena impausada a l’èx-primièr ministre italian a un an de preson per l’aplicacion de la Lei de l’Indulte. Aquela nòrma, aprovada en 2006 per redusir lo nombre de presonièrs dins las presons italianas, permet de perdonar fins a un maxim de tres ans de condemnacion, per de faches que se son debanats abans l’aprobacion. Se Berlusconi benefícia d’aquela lei, intrarà pas en preson perque l’an ja condemnat per una fraudariá fiscala comesa en 2006; donc los quatre ans se redussisson a un.