L’ÒLO (Obrador de Lingüistica Occitana) es lo collòqui de l’associacion Lingüistica Occitana que tanben fa paréisser una revista en linha: revistadoc.com. Es un eveniment qu'amassa de lingüistas de pertot e benefícia d’un comitat scientific reconegut. Après Tolosa e Munic s'es decidit que l'ÒLO que ven se tendriá a Pau. Vos comunicam doncas la crida a comunicacions.

L’Obrador es dobèrt a totes los que vòlon intervenir sus una question de lingüistica occitana. La primièra jornada aurà coma tèma: “Operativitat de las divisions cronologicas (occitan medieval, modèrne, contemporanèu…) e de las divisions dialectalas”. La seconda jornada serà liura e las comunicacions poiràn pertocar totes los camps (lexic, sintaxi, morfologia, fonologia, dialectologia, sociolingüistica…) tant en sincronia coma en diacronia. Los apròchis comparatius son benvenguts. Aquel encontre pòt èsser l’escasença de presentar un trabalh acabat o en cors d’elaboracion.
 
Se prevei un temps de 30 minutas per cada comunicacion (20 minutas per la presentacion + 10 minutas de discussion). Las lengas de comunicacion seràn l’occitan, una autra lenga romanica o l’anglés.
 
La participacion al collòqui se fa a res-non-còst, mas es obligatòri de venir sòci de l’associacion. L’escotisson per un an es de 15 èuros e se poirà pagar sus plaça en espècias.
 
Las personas interessadas devon mandar per corrièr electronic als organizaires (joanbarcelo@ym..., louisou.g @laposte.net, patrick.sauzet@univ...) una proposicion de comunicacion acompanhada d’un resumit d’una pagina (document pdf) en dos exemplars, un dels dos anonim, abans lo 1r d’abril de 2018. Seràn assabentadas de l’acceptacion ou del refús abans lo 1r de mai de 2018.
 
Los actes de l’Obrador, revisats per nòstre comitat de lectura, se publicaràn en linha / en accès liure dins la revista Lingüistica Occitana.
 



Gerard Joan Barceló,
president de l'associacion Lingüistica Occitana.