L’armada dels Estats Units a impausat dempuèi divendres passat lo cobrifuòc nocturne als sieus efectius plaçats en Japon, après las protèstas d’organizacions socialas e politicas qu’exigisson la retirada de las siás basas militaras en Okinawa.

“Emeti l’òrdre de far sonar lo cobrifuòc amb efièch immediat per tot lo personal militar plaçat en Japon, definitivament o de faiçon temporària”, çò declarèt lo cap de las fòrças armadas estatsunidencas en Japon, lo General Sam Angelella.
 
Segon l’AFP, dos soldats americans, de 23 ans, foguèron arrestats dimars passat per lo presumit viòl d’una jove japonesa, que l’avián tanplan ferida al còl. Aquel incident aluquèt tornarmai lo fuòc entre lo mond de l’illa, que ne son farts dels excèsses dels soldats estatsunidencs.
 
Lo primièr ministre japonés Yoshihiko Noda e d’autres membres de l’executiu e del govèrn provincial d’Okinawa condemnèron amb duretat los faches.
 
Es lo primièr còp que los Estats Units executan un cobrifuòc per las lors tropas en Japon, segon de declaracions del Ministèri dels Afars Exteriors de Japon a l’agéncia Kyodo.
 
Qualques 22_000 dels 47_000 soldats americans plaçats en Japon son desplegats en Okinawa, una pichona illa de l’extrèm sud de l’archipèla, ont los estatjants planhon totjorn los destorbis e l’inseguretat que provòca aquela preséncia militara massissa.
 
Al començament de setembre, de desenats de milièrs de personas manifestèron en Okinawa per s’opausar al desplegament de 12 avions militars estatsunidencs d’enairament vertical Osprey, après qualques accidents d’aqueles aparelhs en d’autres endreches.
 
Okinawa fa partida de l’archipèla de las Illas Ryukyu. Sos estatjants, los ryukyuans, son una minoritat etnolingüistica que subís durament la dominacion japonesa, que s’apond a la dominacion militara estatsunidenca.