La Cort Europèa dels Dreches Umans (CÈDU) a condemnat tornarmai l’estat espanhòl, ara per aver punit dos joves que cremèron en 2007 de fòtos dels reis d’Espanha d’alavetz, Joan-Carles Ir e Sofia de Grècia, dins l’encastre d’una manifestacion politica. La justícia espanhòla los condemnèt per d’”injuras grèvas a la corona” e per un “delicte d’òdi”.
 
Los jutges de la cort d’Estrasborg an considerat a l’unanimitat que la justícia espanhòla manquèt a la libertat d’expression e de pensada que garentís l’article 10 de l’Acòrdi Europèu dels Dreches Umans.
 
Los joves, Enric Stern e Jaume Roura,  foguèron inicialament condemnats a quinze meses de preson, mas lo jutge lor permetèt d’evitar l’embarrament se pagavan una multa de 2700 èuros cadun. Ara, la CÈDU considèra que l’estat espanhòl deu tornar als joves l’argent d’aquelas multas e mai lor donar una indemnitat de 9000 èuros.
 
Segon los magistrats europèus dels dreches umans, “mancar a la libertat d’expression e la far passar per un delicte d’òdi pòrtan tòrt al pluralisme, a la tolerància e a l’esperit dobèrt”. Dins aquel sens an condemnat la justícia espanhòla, e mai que mai son Tribunal Constitucional, per aver enseguit “la simpla expression d’idèas politicas”, es a dire per aver enebit d’expressions publicas jos l’escampa que quand se critica amb duretat las institucions se provòca d’òdi.
 
Podètz trobar la senténcia completa de la CÈDU aicí.
 
 
Una longa procedura
 
L’afar dels dos joves condemnats arribèt a la cort d’Estrasborg fa dos ans, après aver agotat totas las possibilitats d’apelacion possiblas qu’ofrís la justícia espanhòla.
 
Los joves foguèron condemnats en 2007 per la dicha Audiéncia Nacionala, un tribunal d’excepcion especializat en delictes de terrorisme. Puèi l’avocat apelèt al Tribunal Constitucional espanhòl, qu’esperèt fins a 2015 per ratificar la senténcia. Aquel naut tribunal conclusiá que la libertat d’expression aparava pas lo fach de cremar de fòtos del rei d’Espanha car èra “una accion ofensiva e d’incitacion a l’òdi”.
 
 
“Criticar las institucions de l’estat jamai non serà d’òdi”
 
Ara, l’avocat dels dos joves, Benet Salellas, a declarat als mèdias que la senténcia de la CÈDU es una victòria que demòstra que la critica politica deu èsser totjorn protegida en democracia. “La senténcia ditz clarament que la critica politica contra las institucions de l’estat serà pas jamai un discors d’òdi”.
 
 

 
 
Mentretant, Amnestia Internacionala denóncia que l'estat espanhòl abusa de las leis antiterroristas per reprimir la libertat d'expression, e soslinha las senténcias contra los cantadors de rap coma mòstra d'“intolerància creissenta e perilhosa”.