En Astarac, la Pòsta qu’abaisha (enqüèra) las òras d’ubertura deus uishets au public. Ua navèra organizacion qui serà efectiva a comptar deu 3 d’abriu que ven. Que pertòca Miranda donc, mes tanben Masseuva, Mielan, Marciac, Plasença, Montesquiu, Sheishan e Vilacomdau. En mejana, que’us tiran quate òras d’ubertura per setmana.
 
Com sovent (a cada còp?), la decision qu’estó presa per la direccion shens consultar ni los maires ni los sindicats. E maugrat la contèsta, lo resultat qu’ei lo medish: mensh de servicis publics e mensh d’emplecs en la ruralitat. Mei que mei, qu’acusan la direccion de la Pòsta de voler forçar las comunas a crear agéncias postaus comunaus: aquestas que son  geridas per las comunas, en contrapartida d’ua redevença annau de la pòsta, çò qui ne convien pas a la màger part deus maires. Mes tanben, çò qui’us enmalícia, qu’ei lo calcul de la Pòsta entà justificar aqueth cambiament. En efèit, qu’aurén observat ua baisha de frequentacion deus burèus en 2016 per rapòrt a 2015, mes sus aquera tempsada, qu’avèn dejà impausat ua baisha deus oraris d’ubertura. Qu’ei donc normau d’i observar ua baisha de frequentacion! Deu costat de l’emplec en tot cas, lo calcul qu’ei pro simple. Dab aqueth cambiament, que suprimeishen l’equivalent de drin mei de cinc pòsts, sia 20% deus efectius.
 
 
 
Ràdio País