Los cendres del dirigent istoric del Movement Indian American foguèron escampats en los Black Hills. Means aviá dirigit la revòlta contra l’FBI a Wounded Knee.

Los cendres del cap indian Russell Means, que son nom lakota es Oyate Wacinyapin (Lo qu’Ajuda los Autres), foguèron escampats a las montanhas dels Black Hills, en Dakota, consideradas pels sioux coma tèrra sagrada. Lo sieu darrièr viatge foguèt un cortegi de cavalièrs qu’escortavan un caval sens cavalièr. La familha e los amics, en seguissent la tradicion, cavalquèron qualques oras al costat en cantant de cançons per l’acompanhar al viatge “cap als ancessors”.
 
Russell Means, de setanta dos ans, èra la figura mai representativa del Movement Indian American. En 1973, Russell Means venguèt famós quand dirigiguèt l’ocupacion amb d’indians sioux e de qualques autras tribus de la resèrva indiana de Pine Ridge (Wounded Knee). Mai de tres cents indians luchèron armats contra l’FBI pendent setanta un jorns. Wounded Knee èra estat en 1890 la scèna de la darrièra batalha entre los indians americans e los Estats Units.
 
Après, Means se desmarquèt del Movement Indian American, fòrça dividit en de faccions contràrias, mas es totjorn estat respectat coma una de las grandas voses indigènas dels Estats Units. Sa popularitat cresquèt fòrça tre 1992, quand comencèt d’aparéisser dins de filmes coma Lo Darrièr dels Moïcans.