Los Dragons al fons del trauc
 
Aquò èra pas jamai arribat als Dragons dins una partida de Superliga a Brutus: marcar pas un sol punt. Mas, aqueste dissabte, en presentant un jòc estereotipat e sens èime, an pas trapat cap de solucion per arrestar la maquina dels Lops de Warrington que marcan cinc ensages e ganhan: 26-0.
 
Lo temps terrible de Pascas arriba amb los desplaçaments a Hull FC (divendres 23) e Salford (divendres 30) e las recepcions d’Huddersfield (diluns 2 d’abril) e Wigan (dissabte 7 d’abril). Se las campanas capitan de tornar de Roma, los Dragons devon èsser plan capables de tornar trapar los camins de la victòria. Seriá temps, ça que la, de lor i anonciar que la sason a començat dempuèi un mes e mièg!
 
Dijòus, Hull-KR ganhèt largament a Huddersfield: 38-6. Divendres, al tèrme d’una partida disputada, Leeds ganhèt a Saint Helens: 28-20 alara que Salford prenguèt l’avantatge sus Hull-FC: 24-8. Lo marrit temps remanda Castleford-Wigan a una data ulteriora .
 
 
Tres recepcions pascalas per Tolosa
 
Temps de Pascas tanben en Championship amb 4 partidas en 15 jorns. Lo Tolosa Olimpic reçauprà Halifax aqueste dissabte 24 a 6 oras del vèspre, abans d’anar a Londres (divendres 30) e de reçaupre Toronto (diluns 2, 15h) e Barrow (dissabte 7, 15h). Rapelam que Tolosa reçaup sus la pelena de Blanhac en esperant la mesa a disposicion d’un estadi dels Minims renovat.
 
 
Los Dragons en cap de fila
 
Aqueles Dragons son los de Sant Jòrdi-Illawarra qu’entamenan plan coma cal la sason d’NRL amb una segonda victòria e, de mai, cò de las Làmias: 20-16. Gardan atal la primièra plaça al classament. Vertat que de l’autre costat de la planeta se fan las causas a l’envèrs!
 
Segonda victòria tanben: pels Combatents neozelandeses (20-8 contra los Titans); per Penrith (18-14 contra los Lapinons); pels Tigres (10-8 contra Melbourne) e per Newcastle (30-28 contra los Raiders).
 
Los Poletons an batut los Dògols 30-12 e Manly es sens pietat per Parramattà: 54-0.
 
Arriba sovent al fotbòl que los pals arrèsten la pauma que vòl dintrar dins la gàbia. Al rugbi, los pals pòdon remandar tombats, transformacions e penalitats. Dins lo dèrbi de Queensland, Bròncos-Vaquièrs, aquò’s lo segonda-linha dels Vaquièrs qu’èra a mand de marcar l’ensag de la victòria quand dintrèt plen fèr dins un pal (un palfèr!), perdèt la palma e daissèt la victòria als Bròncos: 24-20.
 
 
Elèit 1: Avinhon afirma sas pretensions
 
En campionat d’Elèit 1, pel segond còp de la sason, Avinhon s’es mostrat mai fòrt que Lesinhan: sièis ensages marcats per tres d’encaissats e los còps de pè d’Arnaud (4 penalitats e 3 transformacions): 20-6 a la pausa, 40-18 al final. A Sent Gaudenç, Carcassona mena 22-4, mas se fa batre sul fil pels Orses: 25-24. Victòria logica a l’exterior per Limós a Vilanòva (42-10). A domicili, Tolosa jòga a la remontada: 31-20 per Albi a l’ora de jòc, 35-34 pels Tigres a cinc minutas de la fin, e victòria finala de Tolosa: 38-35!!!
 
Lo dèrbi catalan vei la victòria dels Dragonets a Palau: 28-8.
 
Quatre esquipas se trapan en cap de classament amb 26 punts: Avinhon, Lesinhan, Limós e Dragonets.
 
Al programa de la dimenjada qu’arriba: Carcassona-Vilanòva, Albi-Avinhon, Lesinhan-Sent Gaudenç, Palau-Tolosa e, en cap d’aficha, Dragonets-Limós.
 
Dins una serada bèla, aqueste dissabte 24, Lesinhan celebrarà sos campions de… 1978 (victòria 3-0 contra lo XIII Catalan, a l’Estadium de Tolosa).
 
 
 
 
Alan Roch