Au moment on començan las famosas assisas deu transpòrt aerian francés, lo 20 de març), sus la rota, que bolega tanben!
 
A Nogaròu (Baish Armanhac), que vienen de crear l’associacion Gascogne sans poids lourds (Gasconha shens camions). Que’n son harts de patir los passatges a contunhar de camions, de Barçalona de Gers dinc a Manciet. Que son quasi un milièr de camions per dia qui an causit de traucar lo parçan entà estauviar lo prètz deu peatge de l’autorota vesia. Que hè 4 ans qu’an lançat l’alèrta sus plaça, mes peu moment, ne va pas miélher, e lo nombre de camions que creish tostemps mei. Alavetz, entà organizà’s, amassà’s e espandi’s, los abitants qu’an decidit de crear la lor associacion. Atau, qu’espèran miar un combat mei eficaç dab los elejuts, lo public... e tanben la lei! Pr’amor qu’ei adara suu terrenh juridic que’s deberé seguir la batèsta, luenh de l’operacion escargòli de noveme passat. E tà començar, ua peticion qu’ei estada lançada divés passat entà obtiéner tot simplament l’interdiccion peus camions de traucar los vilatges deu parçan. Los domaus qui i son ligats que son nombrós: la deterioracion de las rotas, lo brut, la pollucion, la seguretat, shens comptar las consequéncias negativas peu torisme e per l’immobiliari.
 
Legaument, que sufiré qu’estosse desclassat, l’itinerari, en rota departamentau, quan ei peu moment considerat com itinerari “grana circulacion”.
 
Qu’ei donc aviada la batèsta administrativa e juridica francesa, que pòt donc durar...
 
En las Lanas totun, que s’i son escaduts, dab problèmas deu medish escantilh, òm pòt donc esperar en Gers. Ahar de seguir. 
 
 
 

Ràdio País