Deth 20 ath 23 de març, 44 gafets de 5u e 4u qu’estúdian eth occitan o eth latin ath collègi Emile-Paul Vayssié d’Aurinhac (Baish Comenge), acompanhats peths lors professors d’Occitan, de Latin e de Sciéncias dera Vita e dera Tèrra, que participèren a un viatge pedagogic que les amièc a Bordèu e en Peiregòrd. Aqueth viatge que s’inscriu en un projècte interdisciplinari aperat “Eths nòstis ajòus, eths aquitans”.
 
Eth accent qu’èra botat sus era Aquitània romana e medievala. Era visita deth Musèu d’Aquitània, situat a Bordèu, que permetec atau aths collegians de descobrir vestigis arqueologics de prumèr plan e de comprénguer ce quin era Aquitània venguec arromana. Après, en tot visitar era partida medievala deth musèu, eths joesis que comprengueren ce quin eth Ducat d’Aquitània estèc un territòri estrategic pendent era Guèrra de Cent Ans, abans de vénguer ua província francesa après era des·hèta anglogascona de Castilhon, en 1453.
 
Après Bordèu, eth grop qu’arribèc en Peiregòrd Nere (Sarlat, era vath de Dordonha, era bastida de Vièlafranca de Peiregòrd) e Peireguers. Après era visita dera catedrala Sent Front, eths collegians d’occitan qu’estèren arrecebuts ena Agéncia Culturala Dordonha-Peiregòrd, on assistèren a ua mediacion sus eths trobadors, aqueris poètas qu’estèren eths prumèrs escrivans d’Euròpa occidentala a utilizar ua auta lenga qu’eth latin, eth occitan, e que son ara origina d’ua literatura prestigiosa. Ath madeish moment, eths escolans de latin que visitèren eth musèu Vesunna, consacrat ara Ciutat deths Petrucòres, creada peth emperaire August de cap 16 abans J.-C. e ath son caplòc que tira son nom d’ua divinitat indigèna.
 
Aqueth viatge qu’èra tanben en arrelacion damb eth programa deras Sciéncias dera Vita e dera Tèrra. Eths collegians que descobriren atau era Maison deth Castanhèr, ath sud a fèt de Peiregòrd, e tanben era exposicion Luminopolis, a Bordèu, on les caliá arrespóner a enigmas sus eth lum. 
 
Enfin, que cau senhalar eth bon comportament deths collegians tot ath long deth viatge. Que les cau ara acabar eth quasernet de viatge que son cargats de completar damb comptes renduts deras visitas, impressions, illustracions e petits objèctes personaus. Aqueris libets e un diaporama que seràn presentats aths parents ara fin dera annada escolara.
 
 
 
 
Joan-Pau Ferré
                          
                      
           

fffff		fffff
	Jornalet a l'escòla Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a. Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans. Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…