Organizat despuish 2004 peth Ostau Comengés, Passa-Pòrts que n’é enguan ara sua 15u edicion. Que’s passarà deth 6 ath 7 d’abriu, a Montrejau (Nebosan). Que i a plan solide hestau mès prestigiosis qu’eth nòste mès que podem díguer qu’é aué un hestau arreconegut, a talha umana, e qu’a eth gran meriti d’èster ua veirina que balha visibilitat ara cultura occitana en Comenge e credibilitat aths actors que’n hèn era promocion.
 
Passa-Pòrts qu’a ua identitat dobla. Qu’é prumèr un hestau occitan qu’a tostemps privilegiat eth rencontre e eth escambi dab eths occitans de Gasconha… o de mès luenh. Despuish 15 ans, qu’avem atau acuelhut uns quantis grops vengudis deths quate cantons d’Occitània: de Gasconha, deras Valadas occitanas d’Itàlia, d’Auvèrnhe, de Lengadòc, dera Gasconha tolosana, de Bigòrra, de Biarn, sense desbrembar eths que son vengudis de Coserans e de Comenge. Enguan, que vam atau acuélher un grop niçard, L’as pagat, lo capèu? e un joen grop comengés, Toti tres, on arretrobam Matiu Barés e eths sòns amics de Luishon.   
 
Passa-Pòrts qu’a tanben ua identitat pirenenca. En sòn nom, que i a ua referéncia clara ara montanha e aths còths qu’an tostemps permetut eths escambis dab eths dus costats. Qu’é pr’amor d’aquò qu’avem programat artistas d’Aragon o de Catalonha dab qui avem un tepèr de punts comuns e d’afinitats. Après eths vesins aragonesis e catalans, que mos a donc semblat ua evidéncia de convidar un grop vengut deth País Basco e quin grop! Patxi eta Konpania, creat per Patxi Perez, era referéncia dera musica tradicionala basca.
 
Passa-Pòrts n’é cap solament un gran bal trad: qu’é tanben un lòc on amassam collegians e liceans qu’aprenguen eth occitan en eths establiments deth parçan. Enguan, que seràn 400, eth divendres 6 d’abriu, entara Jornada deths Gafets, organizada en partenariat dab era associacion D’Arts e d’Òc. Eth maitin, que i aurà espectacles presentats peths escolans (peçòtas de teatre, cant) e un minibal tradicionau. Era vrespada, après era iniciacion aras quilhas ath malhet, Arnaud Cance que serà sus era scèna entà son espectacle Saique benlèu.
 
De ser, ua conferéncia, seguida d’ua taula arredona, que serà consacrada aths huecs de Sent Joan e ath sòn classament pera UNÈSCO, en preséncia d’especialistas vengudis de Comenge, de Pau, d’Aran e de Catalonha. Passa-Pòrts qu’é tanben un lòc de formacion.
 
Eth endeman, que proposaram estagis d’acordeon diatonic, de hautbòi, de cant, de danças occitanas o bascas e de fabricacion de halhas de Sent Joan.
 
Enfin, Passa-Pòrts qu’é un moment de convivialitat. Que i aurà ua brava cantada abans e pendent eth sopar, aprestat peths productors deth parçan, ua bona ocasion entà tastar eras especialitats comengesas… abans de prénguer part ath bal que durarà ua bona partida dera net.
 
 
 
 
Joan Pau Férré
 
 

---

— Programa complet
— Inscripcions, entresenhas: contact@ostauc... o +33(0)6 34 95 71 22
 
Entà véder eth vidèo deth an passat: