Paures Audencs que son demorats aqueste dimenge a l’ora d’estiu e qu’an pensat que lo rugbi èra un jòc e que se podiá jogar a la ba-bala sens i metre de nhaca e d’esperit de coesion; que se son dits qu‘èra inutil de tombar dins las rigors ivernalas d’un dimenge ventat e fregeluc…
 
A Vilanòva d’Òlt, los campions de Carcassona dintrèron a la pausa amb un avantatge de 16-10: tres atacas de tria permetián d’amagar l’auséncia de jòc collectiu. E, a la represa, contra lo vent, los Leupards se metèron a i creire, menats pels ancians Laurenç Carrascòe l’entrainaire-jogaire-dobertura Bromley: lo jòc al pè del mesclanha Hyde se concretizava per 2 ensags dels locals que, sus la marca de 18-16, se pagavan un campion plan malaisit e empruntat: 14 paumas tombadas dins lo segond temps. E dire que los aquitans esperavan just de “faire onor al malhòt”.
 
A Limós, malgrat la dintrada del pilar Paaeselina, Avinhon se mostrèt mai en cambas e mai jogaire per profitar de las errors dels roge e negre. Adicion finala: 40-20 pels Provençals.
 
En tèrra catalana, amb una tramontana a desbanar los cagaròts, sus sa pelena, Pià contenguèt los Dragonets: 12-10. La jornada manquèt, dissabte, de començar per una brava suspresa: als Minimes, Lescura contestèt duscas a la còrna la pretenduda superioritat del Tolosa Olimpic per pèrdre fin finala sus la marca estreita de 18-16.
 
Dissabte tanben, los paures Diables roges galleses sus la pelena de Wrexham s’avisèron que la Ròsa aviá plan d’espinas: 80-12 pels angleses, 14 ensags marcats e 12 transformacions!
 
Lo XIII de França, assegurat ja de jogar la finala d’aquel tornèg de tardor contra los angleses, se poirà tre dissabte a Hull faire una idèia de las dificultats contra aquela esquipa que dintra d’un estagi en Africa del Sud (de seguir sus BeinSport).
 
Dimenge, una sola partida de campionat al programa. Dins l’estadi Domèc renovat, ASC e Limós disputaràn un derbi entre doas formacions qu’an doncas plan a se faire perdonar de lor prestacion d’aqueste dimenge. Rendètz-vos a quatre e mièja del vèspre e per se metre en fòrma, una pichona adreiça carcassonesa als adversaris rituals: “A Limós, avèm lo rugbi de mai! Limós, coma una agulha per fissar las certitudas de l’esquipa d’en fàcia. Limós-pebradon: la recepcion serà pebrada! Limós-blanqueta: la pauma corrís duscas a l’ala e se multiplica en combinasons ofensivas. Limós-tap: mèfi al biais local de jogar las tap-penalitats per destapar las situacions compromesas. Limós-caranaval per la bona e simpla rason que lo rugbi es una fèsta e que lo gèste ample de la carabena es una sublimacion de la corsa del 3/4 d’ala. Limós-confetis de punts marcats al planchòt, Limós-roge e negre coma un aire de libertat, de liberacion e de revolucion quand ven lo polit mes de mai. Lo rugbi es bèl quand l’adversari es al nivèl.
 
Dieusses del rugbi, balhatz-nos encara e encara de partidas entre l’ASCarcassona e Limós!
 
Mas per çò qu’es de l’ensag de la finala de 68*, ieu vos pòdi garantir una sola causa: i èra pas!
 
 
 
 
Alan Roch
 
 
 
 
 
 
_____
(*) Ganhada per Limós 13-12 aprèp prolongacion.
 
 
Illustracion: l'aficha de Carcassona-Limós amb lo pilar de Caracssona Tyrone pau que joguèt tanben a Limós.