Un serveire francés es estat licenciat per un restaurant canadenc per agressivitat envèrs sos collègas. El pensa que son actitud correspondiá pas brica a una manca de cortesiá, mas que “la percepcion de sa cultura francesa lo fa semblar agressiu”, çò rapòrta l’AFP e Radio Canada.
 
Ara, la justícia canadenca deurà resòlver se l’an licenciat per sa cultura francesa o per son agressivitat. Guillaume Rey, que trabalhava dins un restaurant de Vancouver, a fach sa denóncia davant lo tribunal dels dreches de la persona de la Colómbia Britanica.
 
L’emplegaire li repròcha d’aver contravengut al còde de bona conducha e de respècte dins l’entrepresa. Li reconeis de qualitats professionalas mas considèra que foguèt mai d’un còp  “descortés, agressiu e irrespectuós” envèrs sos collègas.
 
De son costat, Rey estima qu’es estat victima “de discriminacion contra sa cultura”, dins la quala se tendriá a se mostrar “mai dirècte e mai expressiu”. Crei d’èsser estat licenciat a causa de son actitud “dirècta, onèsta e professionala” e de sos “nauts critèris” apreses dins l’indústria ostalièra francesa.