Shens abelhas sus tèrra, ce ditz, l’èster uman ne poderé pas víver que 4 ans. Qu’ei de mau díser s’ei just lo calcul, mes totun, probable ne s’ac vau pas d’ensajar!
 
Que hè 20 ans totun que los professionaus e cridan viahòra, que’s moreishen las abelhas en França e que baishan las crubadas: la produccion estatau qu’ei estada dividida en tres entre 1995 e 2016. Un drama vertadèr qui passa de luenh l’aspècte economic e comerciau, puish que miaça tanben la vita sus tèrra.
 
Au bèth miei deus copables lavetz, la pollucion, solide, mes sustot los pesticidas, qui deciman colònias a mei har. L’apicultor que hè com pòt, mes de cap a la pression industriau, qu’ei dura la batèsta! Totun, que la cau seguir, sustot que podem notar quauques avançadas, quauques idèas, qui chic a chic, e poderàn benlèu pesar sus la balança a la fin.
 
Hè duas setmanas passadas, qu’èran un bèth centenat de parlamentaris qui demandavan ua aplicacion estricta de l’interdiccion deus neonicotinoïdes a comptar de l’agòr, en tot limitar autant com possible las derogacions. E que òc, pr’amor de la lei sus la biodiversitat de 2016 que preved l’interdiccion d’aqueth insecticida a comptar deu prumèr de seteme de 2018, mes en tot acordar derogacions dinc a 2020...solide que la va caler mantiéner, la pression politica! 135 deputats e senators totun, qu’ei dejà quauquarren.
 
Mes au noste petit nivèu tanben, òm pòt ajudar drin.
 
Atau, tad aqueth mes d’abriu, quan floreishen los casaus, que podetz causir flors e plantas mellifèras, qu’ei a díser qui son las mei estimadas e utilas per las abelhas. Que n’i a 23 qui son repertoriadas, e la màger part que son conegudas e de bon trobar:
lavanda, branon, coriandre, jacint, paparòc, geranium o enqüèra margalida. Segon los expèrts, espandir-las que pòt estar ua ajuda de compte har per las abelhas.
 
Tanben, que sòrt de paréisher un papèr biodegradable, qui marcha com un béver energizant per las abelhas. Qu’ei la societat Bee Saving Paper qui’u perpausa despuish guaire. Un papèr a pegar a casa, sus ua tassa o un sac, e qui ei compausat de glucòsa ric, conhit de granas de plantas mellifèras. A véder...
 
En tot cas, se’ns volem guardar de l’espandida de mèu mondializat, mesclanha de mèu importat, de sucre, e de sabem pas tròp qué, o se tot simplament ne volem pas deishar crebar las abelhas, benlèu que s’ac vau d’ajudar los nostes apicultors a las preservar...en esperant decisions politicas coratjosas. L’ahar qu’ei de talha.
 
 
 
 
Ràdio País