Lo president de la Generalitat de Catalonha, Artur Mas, clavèt diluns passat, 29 d’octòbre, la presidéncia rotatòria de 18 meses de l’euroregion Pirenèus-Mediterranèa amb un acte institucional al Palais de la Generalitat. Dins aquel acte, Mas soslinhèt que la prioritat de l’euroregion es lo corredor ferroviari mediterranèu e la potenciacion economica del territòri, en creant lo pòl de recèrca e innovacion mai important del sud d’Euròpa.

Dins l’acte i aviá tanben lo president de la region de Miègjorn-Pirenèus, Martin Malvy,  que pren la presidéncia de l’euroregion, acompanhat del president de las Illas Balearas, José Ramón Bauzá, e del vicepresident de Lengadòc-Rosselhon, Jean-Claude Gayssot.
 
Los presidents signèron una declaracion conjoncha sus los transpòrts, qu’establís la prioritat pel corredor ferroviari mediterranèu e sa connexion amb lo tot lo sistèma portuari e aerian. La declaracion, segon Mas, deu servir per que lo sud d’Euròpa non venga un “cuol de sac”, mas un “territòri amb las meteissas infrastructuras que lo centre e lo nòrd d’Euròpa, coma es ja lo cas en Belgica, Alemanha o los Païses Baisses”. Dins aquel sens, lo President de las Illas Balearas, José Ramón Bauzá, soslinhèt lo sosten de son govèrn al corredor pr’amor que “cal melhorar la competitivitat dempuèi la connectivitat.”
 
De mai, los quatre representants politics de l’euroregion signèron tanplan una declaracion conjoncha en matèria d’innovacion. L’euroregion “deu venir dins los ans a venir un autentic pòl d’innovacion economica e universitària”, çò diguèt Malvy. S’agís del “melhor esplech” que ne dispausa l’euroregion per “èsser competitius dins l’economia mondiala”, çò soslinhèt lo novèl president de l’euroregion.
 
Segon lo vicepresident de Lengadòc-Rosselhon, Jean-Claude Gayssot, cal “mai que jamai potenciar las relacions euroregionalas” perque lo futur de la construccion europèa “passa per establir una nòva relacion de proximitat amb lo ciutadan, que solament las regions la pòdon ofrir”.