Un tribunal de Moscòu a enebit lo ret social de comunicacion instantanèa Telegram en seguida de la demanda de Roskomnadzor, es a dire l’autoritat russa de las comunicacions, de l’informacion, de las tecnologias e dels mèdias de massa. La decision, dictada divendres passat, s’executèt sul pic e serà efectiva fins que Telegram liure las claus per deschifrar los messatges criptats de l’aplicacion, que permet d’aver de chats secrets.

 

La cort de justícia del districte de Taganski prenguèt solament mièja ora per analisar las pròvas materialas presentadas, en l’abséncia dels avocats de Telegram. Lo creator d’aquela aplicacion, Pavel Durov, volguèt pas que los avocats assistiguèsson a aquel jutjament perque lo considerava coma “una farça” que caliá pas legitimar.

 

L’argument de Russia es que la messatjariá criptada de Telegram facultariá

la comunicacion entre “terroristas”, e las autoritats russas plaçan la procedura dins lo quadre de la lucha antiterrorista. Segon Telegram, la decision contraven al principi constitucional del secret de la correspondéncia, car se se liurava las claus del deschifratge se poiriá accedir als messatges de quin usatgièr que foguèsse.